Ички ишлар вазирлиги томонидан носоз йўлларни таъмирлаш бўйича тегишли ташкилотларга киритилаётган таклифларнинг 50 фоизи ҳам бажарилмаяпти. Бу ҳақда журналистлар билан 30 май куни ўтказилган очиқ мулоқотда ИИВ Йўл ҳаракати хавфсизлиги бош бошқармаси (ЙҲХББ) бошлиғи ўринбосари, полковник Эрали Бозоров маълум қилди, дея хабар бермоқда «Дарё» мухбири Мусулмонбек Иброҳимов.
Мулоқот давомида журналистлар носоз йўллар туфайли кўплаб йўл-транспорт ҳодислари юз бераётгани ва буни бартараф этиш ишлари суст бораётганлигини таъкидлади. Бунга жавобан Эрали Бозоров ИИВ ЙҲХББ йўл қурилиш ташкилоти эмаслигини эслатиб ўтди.
«Йўл қурилиши билан шуғуллунувчи Автомобиль йўллари давлат қўмитаси ва ҳудудларда давлат ҳокимият органлари бор. Бизнинг бошқарма қурувчи ташкилот эмас, биз фақат юқори турувчи мутасадди ташкилотларга таклиф кирита оламиз, холос», — деди полковник Бозоров.
Унинг айтишича, ЙҲХББ томонидан носоз йўлларни таъмирлаш бўйича тегишли идораларга киритилаётган таклифларнинг ярми ҳам қаноатлантирилмаган.
Тўғри, ўнқир-чўнқир ва таъмирталаб йўллар талайгина. Йўлнинг созлигига жавобгар идораларга вилоятлардаги йўл ҳаракати хавфсизлиги бошқармалари томонидан ойда беш-олтита тақдимнома киритилади.Анжуманда ЙҲХББ вакиллари носоз йўллар туфайли рўй бераётган йўл-транспорт ҳодисалари бўйича аниқ статистик маълумот тақдим эта олмади.Бош бошқарма томонидан эса Вазирлар Маҳкамасига ахборотнома юборилади. Бундан ташқари, киритилган барча тақдимномаларнинг нусхалари прокуратура органларига ахборот тариқасида бериб борилади.
Носоз йўлларни таъмирлаш бўйича берилган таклифларнинг ярми бажарилганда эди, ҳозирги муаммоларнинг 80 фоизи ҳал бўларди.
Эрали Бозоров, ЙҲХББ бошлиғи ўринбосари
Изоҳ (0)