Мирзо Улуғбек туманидаги 211-мактабнинг 9- синф ўқувчилари Атом технологиялари ахборот марказига ацҳриф буюрди. Бу ҳақда «Ўзатом» агентлиги матбуот хизмати хабар берди.
Уларга атом технологиялари билан боғлиқ бўлган маълумотлар махсус экспонатлар ёрдамида тушунтириб берилди.
«Айтиш жоиз, VVER – 1200 реакторларига эга АЭС макети – нафақат мактаб ёшидаги болалар, балки катталарда ҳам ҳақиқий атом электр станцияси тасаввурини уйғота олади. Ишланма воситасида ядровий иншоотнинг иш принципи, таркибий қисмлари ва ўзига хосликлари ҳақида билиб олиш мумкин», — дейилади хабарда.
«Физика ўқитувчиси сифатида айни соҳа нақадар мураккаблигини яхши биламан. Демак, ҳар бир кишига атом ва у билан боғлиқ технологияларни яхшироқ тушуниш имконини берувчи марказ ўз вақтида ташкил этилди. Болаларда ҳар бир йўналишга ҳақиқий қизиқишни кўрдим. Катта соҳанинг энг кичик маълумотларини ҳам диққат билан тинглаётганлари бежиз эмас. Чунки реакторлардаги жараёнлар, ядро энергиясининг тиббиётда, қишлоқ хўжалигида қўлланилиши ҳақида маълумот берувчи стендлар киши диққатини бутунлай ўзига қаратади. Биз бу ерга ҳали кўп, бошқа синф ўқувчилари билан ҳам албатта келамиз» — дейди 211-мактаб физика фани ўқитувчиси Галина Жестовских.
Мазкур мактабнинг яна бир ўқувчиси Аяна Аҳмедова жумладан шундай дейди:
«Мен авваллари АЭС қурилиши табиатга ҳам, одамларга ҳам зарар келтиради, деб ўйлардим. Чунки ота – онамдан Чернобил воқеалари ҳақида кўп эшитганман. Агар шундай станция Ўзбекистонда ҳам қурилса, бошқа ерга кўчиб кетаман, дердим хазиллашиб. Бугун олган маълумотлардан яхши тушуниб олдим – Атом станциясининг табиатга зарари йўқ экан. Аксинча, иқлим ўзгаришлари, масалан, глобал исишнинг олди олинади».
Касб танлови арафасида турган ўспиринларга Тошкентда очилиши кутилаётган Москва муҳандислик – физика институти филиали ҳақида ҳам тўлиқ маълумот берилди.
«Болалигимдан физик бўлишни орзу қилардим. Бугун танловим тўғри эканлигига амин бўлдим. Чунки жуда кўп янги жиҳатларни ўрганиб, атом билан боғлиқ баъзи афсоналар тўқима эканлигини тушундим. Асосийси, тинчлик йўлидаги атом энергетикаси инсоннинг зарурий эҳтиёжларини таъминловчи муҳим соҳалигига яна бир бор амин бўлдим. Келажакдаги таълим билан боғлиқ режам аниқ – Тошкентда иш бошлайдиган Москва муҳандислик – физика институти филиалида таҳсил олмоқчиман», — дейди яна бир мактаб ўқувчиси Ержан Султанбаев.
Қайд этиш лозим, мазкур олийгоҳга қабул шу йилдан бошланади. Таълим грант асосида ташкил этилади. Институт битирувчилари «Ўзатом» агентлигининг таркибий бўлинмаларида иш билан таъминлаш кафолатланади.
Изоҳ (0)