Археологлар Рим императори Нероннинг саройи остидан турфа фрескалар билан безатилган махфий хонани аниқлади, деб хабар беради National Geographic.
Ер ости хонасининг деворларида жангчилар (улардан бири камон, қилич ва қалқон билан қуролланиб, рақиби билан жанг қилмоқда), қушлар, рақсга тушаётган кентаврлар, қадимги худолар ва афсонавий маҳлуқлар тасвирланган. Фрескалардан маълум бўлишича, бу жой «Сфинкс хонаси» деб номланган.
Мазкур топилма «Олтин уй» номли саройни таъмирлаш ишлари вақтида тасодифан очилган. Қўшни хонада ишлаётган олимлар нарвонга чиқиб чироқни ёққан, бу эса бурчакдаги тешикни кўриш имконини туғдирган.
Хонанинг катта қисми ҳамон ер остида қолмоқда. Қазишма ишларини олиб бориш бўйича ҳали якуний қарор қабул қилинмаган: деворлар ҳолати, намликнинг юқорилиги ва бошқа омиллар сабаб қазишма ишлари давом эттирилса бутун комплекс қулаб тушиши мумкин.
«Олтин уй»ни қуриш ишлари эрамизнинг 64 йилида содир бўлган ёнғиндан сўнг бошланган. 68 йилда Нерон вафот этгач, ҳали охиригача битмаган сарой эътибордан четда қолиб кетган.
Изоҳ (0)