Яқинда Khan Academy электрон платформасини ўзбекчалаштиришга оид Вазирлар Маҳкамаси қарори лойиҳаси эълон қилинган эди.

Фото: «Khanacademy.org»

Khan Academy 2008 йил АҚШда ташкил қилинган бепул онлайн ўқув платформаси бўлиб, бугунги кунда 31 тилда фаолият юритади:

Сўнгги олти ойдан буён уни ўзбек тилига ҳам таржима қилиш ишлари бошланди. Бунинг учун «Билим онлайн» нодавлат-нотижорат таълим ташкилоти тузилди. Бу ташкилот ўз номи билан нотижорий ташкилот саналади.

Бу лойиҳани ишга тушириш учун Европа тикланиш ва тараққиёт банки 50 минг АҚШ доллари миқдорида грант ажратган. Бироқ ушбу грант ажратилишининг бир бир шарти бор эди:  ташкилот бу грантни олиши учун белгиланган муддатда яна шунча миқдорда, яъни $50 минг халқдан хайрия ёрдамида пул тўплаши керак эди. Шундагина халқаро ташкилот ўз грантини ажратади.

Лойиҳа вакилларининг «Дарё»га маълум қилишича, жамоа Khan Academy платформасини маҳаллийлаштириш лойиҳасининг кейинги босқичи учун керакли миқдордаги маблағни йиғишга муваффақ бўлди. Хайрия акцияси ЙТТБдан (Европа тикланиш ва тараққиёт банки) грант олиш учун амалга оширилди. Банк грантни «матчинг фундс» шарти билан таклиф қилган, яъни маълум бир шартлар бажарилганда, бошқа манбалардан йиғилган маблағга тенг маблағ ЙТТБ томонидан берилади.

«Ўзбекистоннинг турли вилоят ва шаҳарларида истиқомат қилувчи оддий фуқароларимиз билан бирга хорижий давлатларда яшайдиган юртдошларимиз, ҳатто Ўзбекистонга ҳеч қандай алоқаси бўлмаган одамлар ҳам лойиҳани қўллаб-қувватлашди. Мамлакатимиз бизнесменлари ҳам улкан ҳисса қўшишди, улардан кўпчилиги савоб умидида номи ошкор этилмаслигини хоҳлашди. Бундан ташқари, хайрия акциясига Ўзбекистон ва чет эл талабалари ҳам қўшилди», — дейилади хабарда.

Маблағ йиғишга маъсул бўлган «Khan Academy Ўзбек» жамоаси Лондон шаҳрида лойиҳани маҳаллийлаштириш ғоясини тарғибот қилиш ҳамда бевосита маблағ йиғиш мақсадида бир қатор тадбирлар ташкил этди.

Хайриялар барча қитъалардан, кўплаб мамлакатлардан келиб, жами хайрия қилганлар сони 720 кишидан ошди. 2019 йил 7 майда тўпланган маблағ 50 000 евродан ошди.

Грант бериш шартига кўра шу суммага тенг маблағ ЕТТБ томонидан, тақдим этилган барча ҳужжатлар тасдиқлангандан кейин берилиши кутилмоқда.

«Ушбу лойиҳа халқимиз давлат тилидаги қўшимча таълим манбалари ривожига нафақат маънавий, балки моддий жиҳатдан ҳам ёрдам беришга тайёр эканини исботлади», — дейилади хабарда.

Маълумки, лойиҳа 2019 йилнинг 25 январида, «Билим онлайн» ННТ рўйхатдан ўтиши билан бошланган. Жамғарилган маблағ туфайли лойиҳанинг амалга оширилиши тезлашади. Марказий Осиёда биринчи йирик нодавлат таълим технологиялари лойиҳаси бўлган «Khan Academy Ўзбек» Ўзбекистон Республикаси халқ таълими вазирлиги томонидан ҳам қўллаб-қувватланмоқда.

«Билдирилган ишонч ва лойиҳанинг аҳамиятини эътиборга олган ҳолда биз маблағдан фойдаланиш самарали ва шаффоф бўлишига жиддий эътибор қаратамиз. Шу муносабат билан қуйидагилар ишлаб чиқилади:

1) пул маблағларидан фойдаланишни тасдиқлаш тартиби;

2) ички аудит тўғрисидаги низом;

3) маблағлардан фойдаланиш бўйича ҳисобот тизими. Шу билан бирга, бизнинг сайтимизда ва Facebook саҳифамизда ойлик ҳисобот чоп этиб борилади», — дейилади хабарда.