АПЛ. «Ливерпуль» Бенитес жамоасига қарши, «Манчестер Сити» эса «тулкилар»ни меҳмон қилади

3 май, жума куни футбол бўйича Англия Премьер лигасининг 37-турига старт берилди.

Турнинг дастлабки баҳсида «Эвертон» ўз майдонида «Бёрнли»ни қабул қилди.

Учрашувнинг 17-дақиқасида меҳмон жамоа аъзоси Бен Ми ўз дарвозасига гол уриб қўйган бўлса, орадан 3 дақиқа ўтиб «Эвертон» ҳимоячиси Шимус Коулмен ҳисобни 2:0 кўринишига олиб келди.

Шу тариқа «Эвертон» ўз уйида «Бёрнли»ни енгди ва 3 очкога эга бўлди.

4 май, шанба куни аввалги турда «Вест Ҳэм»га мағлуб бўлган (0:1) Лондоннинг «Тоттенҳэм» клуби «Борнмут» майдонига сафар қилади. Учрашув Тошкент вақти билан соат 16:30 да бошланади. Маълумот учун, «шпорлар» 70 очко тўплаган ҳолда мусобақа жадвалида 3-ўринда бормоқда.

Шу куни Юрген Клопп қўл остидаги «Ливерпуль» жамоаси «Ньюкасл»га қарши майдонга тушади. Беллашув соат 23:45 да старт олади. Таъкидлаш жоиз, мерсисайдликлар 36-турда «Ҳаддерсфилд» дарвозасига жавобсиз 5 та тўп киритганди (5:0).

5 май, якшанба куни мусобақа жадвалида 4-поғонани эгаллаб турган Лондоннинг «Челси» клуби «Стемфорд Бриж»да «Уотфорд»ни синовдан ўтказади. Эслатиб ўтамиз, «аристократлар» охирги турда «Манчестер Юнайтед» билан 1:1 ҳисобида дуранг ўйнаганди.

Оле-Гуннар Сульшер бошлиқ «Манчестер Юнайтед» клуби сафарда «Ҳаддерсфилд»га қарши майдонга тушади. Иккала Учрашувга ҳам соат 18:00 да старт берилади. Маълумот учун, «қизил иблислар» 65 очко билан мусобақа жадвалида 6-ўринда бормоқда.

Куннинг сўнгги ўйинида Лондоннинг «Арсенал» клуби ўз уйида «Брайтон» билан ўйнайди. Ўйин соат 20:30 да бошланиши белгиланган.

6 май, душанба куни мусобақа жадвалида етакчилик қилаётган «Манчестер Сити» жамоаси «Иттиҳод» стадионида «Лестер» билан баҳсга киришади. Беллашув соат 00:00 да бошланади. Қайд этиш жоиз, «манкунианлар» аввалги турда Серхио Агуэронинг урган голи эвазига «Бёрнли» устидан ғалаба қозонганди (1:0).