Икки ой аввал Қорақалпоғистон Республикаси Нукус шаҳрида жойлашган ҳарбий қисмга ҳам ўз билим ва салоҳиятига эга бўлган ёш йигитлар муддатли ҳарбий хизматни ўташга қабул қилинган эди, деб хабар беради Миллий гвардия матбуот хизмати.
«Устоз-шогирд» анъаналарини давом эттирган ҳолда Ўзбекистон Республикаси Миллий гвардияси сафларида ҳарбий хизматини бошлаган ёш аскарлар ҳарбий қисмда улкан ҳаётий тажрибага эга, билим савияси кучли бўлган ҳарбий хизматчи устозларга бириктирилди.
Бугунги кунда муддатли ҳарбий хизмат бошланганига қисқа фурсат бўлганлигига қарамай, аскарларга ўргатилган билим ва кўникмалар ўз самарасини бериб келмоқда.
30 апрель куни ёш аскарлар ўз билимларини синаб кўрди, аниқроғи, уларга ҳарбий техника, қурол-аслаҳалар борасида эгаллаган ва тўплаган маълумот ҳамда билимларини амалда қўллашларига шароит яратиб берилди.
Дала ўқув майдонида ёш аскарлар учун ташкил этилган дастлабки ўқув тактик машғулотлари ўтказилди. Машғулот мобайнида 12 та ўқув нуқтаси тайёрланиб, ушбу ўқув нуқталарида қуролни тўғри отиш ҳолатига келтириш, қуролни қисмларга ажратиш ва қайта йиғиш, граната улоқтириш, тунги оптик мосламаларни ишга тайёрлаш каби машқларни янги инновацион ёндашувлар асосида ўргатиш режага асосан амалга оширилди.
Дала машғулотлари якунида муддатли ҳарбий хизматчилар ўқ отиш машқларини бажарди. Деярли барча аскарлар ҳарбий техника ва қурол-аслаҳалар бўйича берилаётган билимларни яхши ва аъло баҳоларга ўзлаштирганлигини намоён эта олди. Уларнинг орасида белгиланган вазифани тўла-тўкис бажарган ёш аскар Муроджон Жуманов барчага ўрнак тариқасида кўрсатилди.
«Қуролни қўлимга олганимда мен шуни ҳис қилдимки, менинг зиммамга Она Ватаним ва унинг ор-номусини ҳимоя қилиш юклатилган. Буюк аждодларимдан мерос бўлиб келаётган ғурур ва ифтихор туйғуси мени дадил одим ташлашимга сабабчи бўлди. Шу сабабли, мен келгусида Миллий гвардия сафларида Она Ватаним тақдирини ўз тақдирим билан боғламоқчиман», —дейди оддий аскар Муроджон Жуманов.
Изоҳ (0)