Фарғонада маҳалла посбони қўшнисини уриб, ўлдириб қўйди. Бу ҳақда ЎзА хабар берди.
Раҳмонжон Ортиқов Фурқат туманидаги «Чек кўприк» маҳалла фуқаролар йиғинида жамоатчилик тузилмаси раҳбари вазифасида ишларди. У 2018 йил 27-октябр куни соат 22.00ларда ҳамқишлоғи билан спиртли ичимлик ичиб, уйига қайтаётганида маст бўлган қўшниси К.Содиқов билан ўзаро гап талашиб, жанжаллашади. Жанжал давомида К.Содиқов маҳалла посбонининг юз қисмига боши билан уриб, енгил тан жароҳати етказган.
Р.Ортиқов қўшнисини тинчлантириш ўрнига муштлашишни давом эттириб, қўл ва оёқлари билан юзи ва баданининг турли жойларига бир неча маротаба уриб, ҳаёт учун хавфли бўлган оғир тан жароҳати етказиб, унинг ўлимига сабабчи бўлган. К.Содиқовнинг мурдаси йўл четидан оқиб ўтувчи зовур ичидан топилган.
Олиб борилган тезкор суриштирув ҳаракатлари давомида Р.Ортиқовнинг яшаш хонадонидан бир жуфт оёқ кийим ва ёниб кетган кийимларнинг қолдиқлари холислар иштирокида далилий ашё тариқасида олинган.
Жиноят ишлари бўйича Фурқат туман судида Р.Ортиқовнинг жиноят иши кўриб чиқилиб, унга Жиноят Кодексининг 104-моддаси 3-қисми «д» банди билан 8 йил муддатга озодликдан маҳрум қилиш жазоси тайинланди.
Изоҳ (0)