30 апрелнинг эътиборга молик янгиликлари — «Дарё» дайжестида.
Шавкат Мирзиёев 30 апрель куни ташриф билан Сурхондарё вилоятида бўлди.
Президент Сариосиё туманидаги Тўполанг гидроэлектр станциясини бориб кўрди.
Шундан кейин Сариосиё туманидаги Шарғун кўмир конида олиб борилаётган ишлар билан танишди.
Сўнг Бойсун туманидаги «Мустақилликнинг 25 йиллиги» газ конида янги газ-кимё комплексини барпо этиш лойиҳаси доирасида амалга оширилаётган ишлар ва келгусида эришиладиган натижалар ҳақидаги тақдимот намойиш этилди.
Шунингдек, давлат раҳбари Бойсун туманига ташрифи чоғида кекса авлод вакиллари, туман фахрийлари билан учрашув ўтказди.
Бундан ташқари, Президент Шавкат Мирзиёев Музработ туманидаги «Янгиобод инвест сервис» хусусий корхонаси фаолияти билан танишди.
***
28 апрель куни Тула вилоятининг Узловая шаҳридаги «Пятерочка» супермаркетида россиялик 34 ёшли Андрей.К. 33 ёшли Умида исмли кассир аёлга ҳужум қилиб, пичоқ билан 20 га яқин жароҳат етказган. Аёл касалхонада ҳаётдан кўз юмган.
Ушбу ҳолат юзасидан Бандлик ва меҳнат муносабатлари вазирлиги ва Ташқи ишлар вазирлиги расмий маълумотларини берди.
***
Зангиотадаги қамоқхона ходими хизмат хонасида ўзини осди.
Тошкент вилояти ИИБ Жазони ижро этиш бошқармаси тасарруфидаги 42-сонли манзил колония тартибот бўлинмаси тезкор вакили 27 ёшли А.А.нинг жасади хизмат кийимининг чарм камарига осилган ҳолда 28 апрель куни соат 9:30 да топилган.
***
ИИВ тизимида 7 нафар янги раҳбар тайинланди.
Хусусан, Қорақалпоғистон Республикасининг бир қатор туманлари Ички ишлар бўлими бошлиқлари, Самарқанд вилояти Булунғур тумани, Андижон вилояти Олтинкўл ва Андижон туманлари Ички ишлар бўлими бошлиқлари тайинланди.
***
Ўлдирилгани айтилган ИШИД етакчиси Ал-Бағдодий 5 йил мобайнида илк бор кўриниш берди.
Видеода Ал-Бағдодий сафдошлари билан Суриянинг Багуз шаҳри учун кечган жангларни муҳокама қилаётгани тасвирланган.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)