Мудофаа вазирлиги вакиллари Вьетнамда ҳарбий спорт кенгаши Бош ассамблеясида иштирок этди
Қуролли Кучлар Бош штаби жисмоний тайёргарлик ва спорт бўлими бошлиғи подполковник Азиз Ҳайдаров ва Мудофаа вазирлиги Спорт клуби бошлиғи подполковник Мансур Мамадаминов Вьетнамнинг Хошимин шаҳрида бўлиб ўтаётган 74-халқаро ҳарбий спорт кенгаши (CISM) Бош ассамблеясида қатнашди. Бу ҳақда Мудофаа вазирлиги матбуот хизмати хабар берди.
Тадбир 30 апрелга қадар давом этган бўлиб, унда дунёнинг 98 давлатидан келган ҳарбий спорт мутахассислари иштирок этган.
Ассамблея давомида жорий йилнинг 18—27 октябрь кунлари Хитойнинг Ухан шаҳрида бўлиб ўтадиган VII Бутунжаҳон ҳарбий-спорт ўйинларига тайёргарлик, қуръа ташлаш ҳамда 2020—2021 йилларда ўткизиладиган мусобақалар бўйича спорт тақвими режаси кўриб чиқилган.
VII Бутунжаҳон ҳарбий-спорт ўйинлари давомида 136 давлат терма жамоаларининг ҳарбий спортчилари спортнинг 27 та тури бўйича куч синашиши кутилмоқда. Ўзбекистон Мудофаа вазирлиги терма жамоаси ҳам дунё армиялари ўртасидаги энг йирик спорт ўйинларида қатнашиши кўзда тутилган.
Маълумот учун, Халқаро ҳарбий спорт кенгаши ёки International Military Sports Council (IMSC) ёки Conseil International du Sport Militaire (CISM) — жаҳонда йирик спорт фанлараро ташкилотларидан бири ҳисобланади. У 1948 йилнинг 18 февраль куни Франциянинг Нисса шаҳрида ташкил топган. Ҳозирги вақтда CISM Халқаро олимпия қўмитасидан кейин дунёнинг энг нуфузли спорт ташкилоти ҳамда Military World Games ва World Military Cup (Бутунжаҳон армия ўйинлари) каби катта аҳамиятга эга бўлган халқаро спорт тадбирларининг ташкилотчиси ҳисобланади.
CISM’нинг фарқли томони шундаки, у фақат ҳарбий спортчиларни ўзаро бирлаштиради. Халқаро ҳарбий спорт кенгашини ҳарбий спортни ривожлантиришда илмий ва техник ёндашишларни ўрганиш бўйича ўзининг академиясига эга.
