Самарқанд шаҳрида вилоят ички ишлар бошқармасининг янги ташкил этилган хавфсиз туризмни таъминлаш бошқармаси ҳамда «Ситуацион марказ» учун бунёд этилган бино фойдаланишга топширилди. Тадбирда Ўзбекистон Ички ишлар вазири Пўлат Бобожонов, Самарқанд вилояти ҳокими Эркинжон Турдимов иштирок этди, дея хабар бермоқда «Дарё» мухбири Фарҳод Норбўтаев.
Президент Шавкат Мирзиёевнинг ички ишлар органлари фаолиятини такомиллаштириш, улар иш самарадорлигини оширишга қаратилган фармон ва қарорлари ҳамда 2018 йил 17–18 март кунлари Самарқанд вилоятига ташрифи чоғида берилган топшириқлар ижросини таъминлаш мақсадида қурилган бинода замон талабларига мос шарт-шароит ва имкониятлар яратилган.
Жумладан, «Ситуацион марказ» тўлиқ замонавий техникалар билан жиҳозланган, 900 терабайт ҳажмга эга 2 дона сервер харид қилинган. Айни пайтда Самарқанд шаҳрида мавжуд 4 мингдан ортиқ видео узатув камераларининг 1100 дан зиёди геоинформацион тизимига тўғридан-тўғри уланган. Шунингдек, содир этилган жиноятни иссиқ изидан очиш мақсадида профилактик ҳисобда турган шахслар тўғрисидаги маълумотлар киритилган. Жумладан, муқаддам судланганлар, спиртли ичимликка ружу қўйганлар, нотинч оилалар, руҳий касаллар ва бошқа турдаги профилактик ҳисобда турувчи шахслар тўғрисида маълумотлар киритилган.
Самарқанд шаҳрининг геоинформацион харитаси орқали ҳар бир маҳалладаги хонадонлар, таълим муассасалари ва бошқа объектлар, ҳуқуқбузарлик ва жиноятчилик ҳолати ҳақида зарур маълумотларга эга бўлиш мумкин. Марказда вилоят ички ишлар бошқармасининг тегишли соҳавий хизматлари ходимларининг доимий навбатчилиги йўлга қўйилди.
Жамоат тартибини сақлаш ҳамда фуқароларга ўз вақтида ёрдам кўрсатиш мақсадида синов тариқасида Регистон майдонига SOS тугмаси ўрнатилган.
– Бугунги кунларда маҳаллий дастурчиларимиз томонидан яратилган видео тасвир орқали одам юзини аниқлаш тизими интеграция қилиниб, синов тариқасида Темир йўл вокзали, Аэропорт, Регистон майдони, Сиёб бозори, Улуғбек автобекатига ўрнатилиб, назоратга олинган, — дейди Самарқанд вилоят ИИБ матбуот хизмати раҳбари Ширин Норматова. – Бундан ташқари барча соҳавий хизматлар ва фавқулодда тезкор хизматларнинг автотранспорт воситаларига ўрнатилган GPS навигатор қурилмаси геоинформацион тизим билан интеграция қилинган. Бу билан содир этилган ҳодисани бартараф этишда куч ва воситаларни тезкор ва тўғри йўналтиришга эришамиз.
Тадбир давомида иштирокчилар янги бинода яратилган шароит ва ходимларнинг иш фаолияти, Самарқанд вилояти ички ишлар бошқармасининг куч ва воситаларни ягона геоинформацион бошқариш тизими билан яқиндан танишди.
Маросим қатнашчилари Самарқанд вилояти ички ишлар бошқармаси маъмурий биноси ҳовлисида ўрнатилган Мотамсаро она ҳайкали ҳамда хизмат бурчини бажариш чоғида ҳалок бўлган хизматчилар ёдгорлик лавҳаси очилишида ҳам иштирок этиб, сафдошларини хотирлади.
Изоҳ (0)