Samarqand shahrida viloyat ichki ishlar boshqarmasining yangi tashkil etilgan xavfsiz turizmni ta’minlash boshqarmasi hamda “Situatsion markaz” uchun bunyod etilgan bino foydalanishga topshirildi. Tadbirda O‘zbekiston Ichki ishlar vaziri Po‘lat Bobojonov, Samarqand viloyati hokimi Erkinjon Turdimov ishtirok etdi, deya xabar bermoqda “Daryo” muxbiri Farhod Norbo‘tayev.
Prezident Shavkat Mirziyoyevning ichki ishlar organlari faoliyatini takomillashtirish, ular ish samaradorligini oshirishga qaratilgan farmon va qarorlari hamda 2018-yil 17–18-mart kunlari Samarqand viloyatiga tashrifi chog‘ida berilgan topshiriqlar ijrosini ta’minlash maqsadida qurilgan binoda zamon talablariga mos shart-sharoit va imkoniyatlar yaratilgan.
Jumladan, “Situatsion markaz” to‘liq zamonaviy texnikalar bilan jihozlangan, 900 terabayt hajmga ega 2 dona server xarid qilingan. Ayni paytda Samarqand shahrida mavjud 4 mingdan ortiq video uzatuv kameralarining 1100 dan ziyodi geoinformatsion tizimiga to‘g‘ridan-to‘g‘ri ulangan. Shuningdek, sodir etilgan jinoyatni issiq izidan ochish maqsadida profilaktik hisobda turgan shaxslar to‘g‘risidagi ma’lumotlar kiritilgan. Jumladan, muqaddam sudlanganlar, spirtli ichimlikka ruju qo‘yganlar, notinch oilalar, ruhiy kasallar va boshqa turdagi profilaktik hisobda turuvchi shaxslar to‘g‘risida ma’lumotlar kiritilgan.
Samarqand shahrining geoinformatsion xaritasi orqali har bir mahalladagi xonadonlar, ta’lim muassasalari va boshqa obyektlar, huquqbuzarlik va jinoyatchilik holati haqida zarur ma’lumotlarga ega bo‘lish mumkin. Markazda viloyat ichki ishlar boshqarmasining tegishli sohaviy xizmatlari xodimlarining doimiy navbatchiligi yo‘lga qo‘yildi.
Jamoat tartibini saqlash hamda fuqarolarga o‘z vaqtida yordam ko‘rsatish maqsadida sinov tariqasida Registon maydoniga SOS tugmasi o‘rnatilgan.
– Bugungi kunlarda mahalliy dasturchilarimiz tomonidan yaratilgan video tasvir orqali odam yuzini aniqlash tizimi integratsiya qilinib, sinov tariqasida Temir yo‘l vokzali, Aeroport, Registon maydoni, Siyob bozori, Ulug‘bek avtobekatiga o‘rnatilib, nazoratga olingan, — deydi Samarqand viloyat IIB matbuot xizmati rahbari Shirin Normatova. – Bundan tashqari barcha sohaviy xizmatlar va favqulodda tezkor xizmatlarning avtotransport vositalariga o‘rnatilgan GPS navigator qurilmasi geoinformatsion tizim bilan integratsiya qilingan. Bu bilan sodir etilgan hodisani bartaraf etishda kuch va vositalarni tezkor va to‘g‘ri yo‘naltirishga erishamiz.
Tadbir davomida ishtirokchilar yangi binoda yaratilgan sharoit va xodimlarning ish faoliyati, Samarqand viloyati ichki ishlar boshqarmasining kuch va vositalarni yagona geoinformatsion boshqarish tizimi bilan yaqindan tanishdi.
Marosim qatnashchilari Samarqand viloyati ichki ishlar boshqarmasi ma’muriy binosi hovlisida o‘rnatilgan Motamsaro ona haykali hamda xizmat burchini bajarish chog‘ida halok bo‘lgan xizmatchilar yodgorlik lavhasi ochilishida ham ishtirok etib, safdoshlarini xotirladi.
Izoh (0)