Ўтган ҳафтанинг энг муҳим хабарлари тақдимотини бошлаймиз.
Мамлакатимизда никоҳ ёши тенглаштирилди. Ҳозирга қадар никоҳ ёши қизлар учун 17, йигитлар учун 18 ёш эди. 2019 йилнинг 1 сентябридан бошлаб эса 18 ёшга тўлмаган йигит-қизлар никоҳлана олмайди. Бу президент қарорида белгилаб қўйилди. Сенаторлардан бирининг фикрича, бу оила мустаҳкамлигига хизмат қилади.
* * *
Юртимизга оид экзотик хабар. 24 апрель куни Туябўғиз сув омборида қўйдек келадиган балиқ тутилди. Балиқ тортиб кўрилганда унинг оғирлиги 35 килограммни ташкил этди. Уни кўпчилик бир бўлиб тортиб олишган. Ҳозир «Тошкент денгизи» ва атрофидаги каналларда балиқ овлаш яхшиланган.
* * *
Ўзбекистон президенти Шавкат Мирзиёев Пекинга келди. Шавкат Мирзиёев 25 апрель куни Пекинда ХХР раиси Си Цзиньпин билан учрашди. Халқаро валюта жамғармаси бошқарувчи директори Кристин Лагардни қабул қилди. Пекин шаҳридаги «Бир макон, бир йўл» халқаро форумида иштирок этиб, нутқ сўзлади. Ўзбекистоннинг Пекин шаҳридаги элчихонаси янги биносини кўздан кечирди.
* * *
Апрель ойи юртимизга мўл-кўл ёмғирлари билан келди. «Ўзгидромет»нинг изоҳига кўра, мамлакатимиз осмонида жануб ва шимолдан келган нам ва совуқ оқимлар қўшилиб, кучли жалаларни вужудга келтирган. Нима бўлганда ҳам серёмғир ой айниқса шаҳарликларга озмунча ташвиш туғдирмади. Ёмғир ҳудудларда автомобиллар ҳаракатини қийинлаштирди, шаҳарларни сув босди, дарахтлар автомобиллар устига қулади, темир йўллар ва кўприкларга зарар этди. Тоғли ҳудудларда сел келди. Пойтахт эса Венецияга айланди. Самарқанд ҳам «оби-раҳмат»дан бенасиб қолмади, кўчаларида тошқин бўлди. Ургутнинг ярим миллион аҳолиси ёмғир сабабли электрсиз қолди. Жиззах вилоятидаги Жума қишлоғида кучли сув тошқини кузатилди, инфраструктурага беқиёс зарар етди.
* * *
Ўтган ҳафтада пойтахт «Сувсоз» корхонаси нақадар ғалати ишлашини намойиш қилди. Совуқ сув нархининг 24 апрель куни ошганлиги ҳақида 25 апрель куни хабар берди. Аслида 15 кун аввал берилиши керак бўлган хабар бир кун ўтказиб берилгани аҳолида таажжуб ва норозилик уйғотди. Монополияга қарши курашиш қўмитаси ҳолатга аралашиб, эълон берилгандан сўнг 15 кун ўтгач нарх оширилиши мумкинлигини айтди. Демак, нарх 10 майдан бошлаб оширилиши лозим. Қўмита кўрсатмасига амал қилинмаган тақдирда «Сувсоз»га қонунчилик доирасида чора кўрилади.
* * *
9 май — Хотира ва қадрлаш куни ўтказилиши, шунингдек, фашизм устидан қозонилган ғалабанинг 74 йиллиги муносабати билан уруш қатнашчиларига 7,5 миллион сўмдан пул мукофоти берилиши маълум қилинди. Шунингдек, фахрийлар туғилиб-ўсган кўчасига уларнинг номи берилади. Бу кун нишонланиши аввалидан миллий байроғимиз тасвири туширилган «Шараф лентаси»ни тарқатиш акцияси бошланди.
* * *
Жиззах вилоятидаги «Фориш» полигонида Ўзбекистон, Туркия ва Покистон ҳарбийларининг қўшма машғулотлари якунланди. Унда махсус қўшма амалиёт кучлари бўлинмалари томонидан тоғли ҳудудда шартли ноқонуний қуролли гуруҳни разведка қилиш, блоклаш ва йўқ қилиш, вертолёт авиацияси ёрдамида бартараф этиш бўйича вазифалар бажарилди. Экстремал шароитларда яшовчанликни таъминлашда қўл келадиган содда ва унумли механизм намуналари кўрсатиб берилди.
«Дарё» янгиликларини кузатиб боринг. Ўзбекистон ва дунё хабарларидан энг биринчи хабардор бўлинг.
Изоҳ (0)