Самарқанд вилояти ҳокими Эркинжон Турдимов бошчилигидаги самарқандлик раҳбар ва тадбиркорлардан иборат делегация шу йилнинг 6—12 апрель кунлари Хитой Халқ Республикасининг Хенан ҳамда Шандун провинцияларида бўлди, деб ёзади «Zarnews».
Вилоят вакиллари ташриф давомида 2018 йилда Шанхай Ҳамкорлик Ташкилоти давлат раҳбарлари саммитига мезбонлик қилган Синдао шаҳрида ҳам бўлди.
Саммитни ўтказиш ишларини амалга ошириш учун тайёгарлик кўриш объекти кўздан кечирилди. Унда давлат раҳбарларининг учрашувлари ўтказилган барча объектларнинг макетлари, дастурий таъминоти, инфраструктураси ва схемалари жойлаштирилган. Шунингдек, делегация саммитнинг асосий бинолари билан ҳам танишди.
Синдао шаҳри мерининг ўринбосари Сюе Синго билан ўтказилган учрашувда 2022 йилда Самарқандда ўтказилиши кутилаётган Шанхай Ҳамкорлик Ташкилоти давлат раҳбарларининг навбатдаги саммитини юқори савияда ташкил этиш учун ҳамкорлик қилиш, шунингдек, Самарқанд ва Синдао шаҳарларининг туристик имкониятларидан самарали фойдаланиш мақсадида чартер рейсларни амалга ошириш ҳамда ушбу шаҳарларнинг биродарлашув битимини тузишга келишиб олинди.
Изоҳ (0)