Андижон шаҳри ички ишлар органлари фаолиятини мувофиқлаштириш бўлими таянч пунктлари профилактика инспекторлари ёрдамчиларига рухсатнома бериш, профилактика инспекторлари ва маҳалла фаолларини тақдирлаш мақсадида тантанали маросим ўтказилди. Унда Ўзбекистон Ички ишлар вазири, генерал-лейтенант Пўлат Бобожонов иштирок этган. Бу ҳақда вилоят ички ишлар бошқармаси матбуот хизмати «Дарё»га хабар бермоқда.
2018 йил 24 декабрда қабул қилинган Президент қарори асосида «Маҳалла посбони» жамоатчилик тузилмалари раҳбарлари лавозимлари тугатилиб, профилактика (катта) инспекторларининг жамоат тартибини сақлаш бўйича ёрдамчилари лавозимлари жорий этилди. Ҳудудда жиноятлар даражаси пасайган, уларнинг олдини олиш ва бартараф этиш чора-тадбирлари ўз вақтида кўрилган ҳолларда бир вақтнинг ўзида маҳалла фуқаролар йиғинлари раислари ва фаоллари, профилактика (катта) инспекторлари ва уларнинг ёрдамчилари ҳамда «Маҳалла посбони» жамоатчилик тузилмасининг алоҳида ўрнак кўрсатган аъзолари ҳар ойда иш ҳақининг 100 фоизигача миқдорида пул мукофотлари билан муносиб тақдирланиб келинмоқда.
— Вазирлар Маҳкамасининг 2019 йил 26 мартдаги тегишли қарори билан Профилактика (катта) инспекторларининг жамоат тартибини сақлаш бўйича ёрдамчилари фаолиятини ташкил этиш тартиби тўғрисидаги низом тасдиқланди, — дейди вилоят ички ишлар бошқармаси бошлиғи, полковник Шуҳрат Собиров. — Ҳуқуқбузарликлар профилактикаси соҳасида ички ишлар органларига амалий ёрдам кўрсатишлари учун маҳалла фуқаролар йиғинларидан номзодлар ўрганилиб, тегишли рўйхат шакллантирилди. Шу жумладан Андижон шаҳрига ҳам 83 нафар профилактика (катта) инспекторларининг жамоат тартибини сақлаш бўйича ёрдамчилари лавозимлари киритилди.
Тантанали тадбирда ушбу лавозимларга вилоят ички ишлар бошқармаси бошлиғининг буйруғига асосан тайинланган 18 ёшдан 30 ёшгача бўлган муносиб ёшлар ўз хизмат вазифаларини бажаришга киришди.
Андижон шаҳар ички ишлар органлари фаолиятини мувофиқлаштириш бошқармасининг 40 нафар профилактика инспектори ва шаҳардаги 40 нафар маҳалла фаолига рағбатлантириш маблағлари ҳисобидан 73 миллион сўм миқдорида мукофотлар топширилди.
Таъкидлаш лозимки, иш ҳақининг 100 фоизи миқдорида алоҳида ўрнак кўрсатган профилактика инспекторлари Исмоилжон Ортиқов, Масъуджон Мамадалиев ва НодирбекЯкубековларнинг ҳар бири 2,5–3 миллион сўмдан, маҳалла раислари Дилфуза Жалилова, Азизхон Умархўжаев ва Табассумхон Исроиловалар 1 миллион сўмдан пул мукофотлари билан тақдирланди.
Мукофотларни ички ишлар вазири Пўлат Бобожонов ва вилоят ҳокими ШуҳратбекАбдураҳмоновлар топширди.
— Давлатимиз раҳбарининг топшириғига кўра ҳудудларнинг ўзига хос-хусусиятларидан келиб чиқиб, ҳуқуқбузарликлар профилактикасини амалга оширишда вилоятнинг Андижон шаҳри ва Хўжаобод туманида «Намунали ҳудуд» тажрибасини яратиш бўйича ишга киришилди, — дейди вазир. — Ушбу тажрибани яратиш учун 2 та ишчи гуруҳ тузилиб, Андижон шаҳрига вазир ўринбосари А.Бобохонов, Хўжаобод туманига эса Ўзбекистон бош прокурорининг биринчи ўринбосари Э.Таджиевлар масъул этиб тайинланган. Андижон шаҳридаги ишчи гуруҳ томонидан амалга оширилиши лозим бўлган чора-тадбирлар белгиланиб, жорий йилнинг 13–21 апрель кунлари ўтказилган тадбирларда бир қатор ижобий ишлар амалга оширилди.
2019 йилнинг 1-чораги якунлари бўйича шаҳардаги 83 та маҳаллада жиноят содир этилмаган 55 таси «жиноятдан холи», жиноятчилик сони камайган 16 таси «криминоген вазият яхшиланган», жиноятчилик барқарор бўлган 7 таси «криминоген барқарор» ва жиноятчилик сони ошган 5 таси «криминоген мураккаб» ҳудудларга ажратилди ҳамда асосий куч-воситалар криминоген мураккаб 5 та ва жиноятчилик ўзгармаган 7 та маҳаллага йўналтирилди.
Жамоатчилик назорати масканлари фаолияти қайтадан кўриб чиқилиб, хизматга жалб қилинган «Фидокор ёшлар» жамоатчилик патруль гуруҳлари аъзоларининг сони 83 нафардан 332 нафарга кўпайтирилди ва уларнинг барчасига махсус кийим-бош тарқатилди. Шаҳарнинг аҳоли гавжум жойларига 16 та мобил пост, 50 дона ташвиш қурилмасини ўрнатиш ишлари бошланди.
Профилактика инспекторлари маҳаллий бюджет маблағлари ҳисобидан қўшимча 20 дона компьютер жамланмаси ҳамда дастурий таъминот базаларини ўрнатишга мўлжалланган 108 дона «МИ» русумли телефон аппаратлари билан таъминланди.
«Намунали ҳудуд» тажрибаси лойиҳаси доирасида Андижон шаҳрида инновацион технологияларни жорий қилиш, ходимларга етарли шароит яратиш мақсадида вилоят ҳокимлиги томонидан 3 миллиард сўм ва Ички ишлар вазирлиги томонидан 4,2 миллиард сўм миқдорида маблағ ҳамда 8 та хизмат автомашинаси ажратилди.
Шаҳар ички ишлар бўлимлари, маҳалла ва соғлиқни сақлаш муассасалари ҳисобида турган ҳуқуқбузарлик содир этишга мойил шу жумладан 9712 нафар хотин-қизларнинг рўйхатлари шакллантирилиб, уларнинг муаммоларини уйма-уй кириб ўрганиш ва бартараф этиш бўйича ишчи гуруҳлар ташкил этилди.
Изоҳ (0)