Бухоро вилоятининг Вобкент туманида жорий йилнинг 15 март кунидан бошлаб, ҳозирга қадар қурилиши давом этаётган туман марказий бозорида қулаган бетон плита 4 кишини эмас, 1 кишини жароҳатлаган. Бу ҳақда Вобкент марказий бозор қурилиш дирексияси раҳбари Саид Ортиқов «Дарё»га маълум қилди.
Маълумки, бир неча кун аввал, жорий йилнинг 21 апрель куни «Подслушано в Бухаре» каналида эълон қилинган «Бухородаги 27 кунда битказилган бозорда бетон плита қулаб, 4 кишини жароҳатлади» сарлавҳаси остидаги хабар қатор ижтимоий тармоқлар орқали тарқалиб, шов-шувга сабаб бўлган эди. Унда 2 киши жиддий жароҳат олиб, реанимацияга ётқизилгани, яна 2 киши яралангани айтилганди.
— Бундай нотўғри ва асоссиз хабарнинг ҳатто, айрим расмий сайтларда ҳам ҳеч қандай ўрганишсиз ва суриштирувсиз такрорий тарқатилгани бизни ҳайратга солди. 3,9 гектар майдонда Вобкент марказий бозорини қайта қуриш ишлари жорий йилнинг 10 мартидан бошланди. Қурилиш ҳали давом этмоқда. Минглаб ишчи кучи бириктирилган. 18 та пудратчи қурилиш ташкилоти томонидан иш олиб борилмоқда. Бозорнинг турли қишлоқ хўжалиги маҳсулотлари, гўшт, сут ва қандолат маҳсулотлари расталаридан ташқари, 112 та кийим-кечак дўкони, 24 та озиқ-овқат ҳамда 3 та супер маркет барпо этиш ишлари жадал кечмоқда. Юзлаб техник воситалар жалб қилинган. Қарийб 35 миллиард сўмлик маблағ эвазига тубдан қайта тикланаётган туман марказий бозори қурилиши ҳали май ойи охирларига қадар давом этиши, шубҳасиз. Ижтимоий тармоқларда тарқалганидек, одамлар кўз ўнгида давом этаётган катта марказий бозор қурилиши қандай қилиб 27 кунда битказилган бўлиши мумкин?! — деди Саид Ортиқов.
Маълум бўлишича, ҳодиса гўшт маҳсулотлари растаси тикланишида содир бўлган. «Дарё» мухбири воқеага гувоҳ қурувчи ҳамда ёлланма ишчилар билан суҳбатлашганда, бетон плиталар одамлар устига қуламаганига аниқлик киритилди. Аксинча, гўшт растаси томи ётқизилаётган чоғда ағанаган плита устига бир киши сирпаниб йиқилган ва ҳаял ўтмай, плита тескари айланиб, бурчаксимон кўриниш ҳосил қилган. Бола шу бурчакка тушиб қолган. Шу заҳоти унга ёрдам кўрсатилган.
— Гўшт дўкони растасини тиклаш объект сифатида бизга берилган, — деди «Пешкў» қурилиш МЧЖ вакили Санжар Омонов. — Тикланаётган бино бетонлари қуригач, томга плита ётқизилади. Бироқ уч кун кетма-кет ёмғирнинг ёғиши оқибатида ҳали қуйилганига бир ҳафта-ўн кун бўлмаган бетон ва плиталар ёмғир суви билан тўлган. Шунга қарамасдан, плита ётқизила бошланган. Қурилиш технологиясига асосан плиталар кетма-кетмас, балки иншоот томининг ҳар ер-ҳар еридан тўлдирилиб келинади. Бундан ташқари, тажрибасизлик оқибати болалар эҳтиётсизлик қилиб, плита устига ортиқча юк олишган. Бу пайтда фақат битта бола плита яқинида бўлган. Плита ағанагач, бола ҳам унинг устига сирпаниб тушган. Шу заҳотиёт унга кўмак кўрсатилиб, шифохонага олиб кетилган.
Бухоро вилоят ҳокимлиги Соғлиқни сақлаш бошқармаси Вобкент туман тиббиёт бирлашмаси маълумотига кўра, Вобкент туман марказий бозори қурилиши чоғида жароҳатланган 1992 йилда туғилган олотлик Рауф Мирзаев шошилинч тез тиббиёт ёрдам хирургия бўлимига ўрта оғир аҳволда келтирилган. Унга «Бош мия шикастланиши. Бош мия чайқалиши енгил даражаси. Бурун тўсиғи суягининг ёпиқ синиб силжиши. Пешона, чап елка соҳаси юмшоқ тўқималари лат ейишии ва шилинган жароҳати» дастлабки ташхиси қўйилган. Уч кун давомида қилинган муолажалар натижасида беморнинг аҳволида ижобий ўзгаришлар кузатилган. Ота-онасининг қатъий талаби билан бемор Олот туман тиббиёт бирлашмасига кўчирилган.
Олот туман тиббиёт бирлашмаси бош шифокори ўринбосари Рустам Ҳусаиновнинг билдиришича, бемор 4 кун давомида врач назорати остига олинган. Барча муолажалар кўрсатилган ва беморнинг аҳволи яхшилангани туфайли уйига рухсат берилган.
— Ўзим ҳам Вобкент туман марказий бозор қурилишида қурувчи бўлиб ишлайман. Айни ҳодиса чоғида ўзим ҳам бор эдим, — деди Рауфнинг отаси Латиф Мирзаев. — Гўшт растаси дўкони томи плитасини ёпиш чоғида бетонлар устида бир нечта қурувчилар, ёлланма ишчилар бор эди. Бирмас, 8 та плита қулади. Тўғри, аввалига ўғлим битта плита устида сирпаниб йиқилди. Ҳаял ўтмай, ўғлим устига сирпанган плита тескари айланиб кетди. Музлаб қолдим. Яхшиям, атрофдагилар зудлик билан сергак тортишди. Бурчак бўлиб қолган плита остидан арматура ва кран ёрдамида боламни чиқариб, қутқариб қолишди. Бош, елка жароҳатларидан ташқари, оёғи ҳам қаттиқ шикастланган. Нима ҳам дердим, тирик қолганига шукур...
Маълум бўлишича, бемор жами етти кун давомида Вобкент ҳамда Олот туман тиббиёт бирлашмаларида ётиб даволанган. Муолажалар бепул амалга оширилган. Айтиш ўринлики, ота иш чоғида содир бўлган ҳолат туфайли ўрта оғир жароҳат олган боласига қарашга мажбур.
Ота билан суҳбатдан англандики, бахтсиз ҳодиса сабаб қўшимча даромад топишдан маҳрум бўлган оилага мутасадди раҳбарлар томонидан моддий кўмак бериш борасида ҳозирча ўйлаб ҳам кўрилмаган.
Изоҳ (0)