Жиноят ишлари бўйича Тошкент шаҳар суди судьяси Сардор Содиқов пойтахтдаги бозорлар раҳбарлари иши бўйича мажлис бошланишидан олдин «Газета.uz» мухбири Шуҳрат Латиповни суд залидан четлаштирди, деб ёзмоқда «Дарё» — Live.
18 апрель куни 14:00 да Тошкентдаги бир қатор бозорлар раҳбарлари ҳамда шаҳар департаменти амалдорларига нисбатан жиноят ишини кўриб чиқиш бўйича очиқ суд мажлиси режалаштирилган эди. Мажлис олдидан мухбир судья котибидан суд жараёни аудиосини ёзиб олиш учун диктофондан фойдаланиш мумкинлигини сўрайди. Котибнинг илтимоси билан унга журналист гувоҳномаси кўрсатилади.
Судья Сардор Содиқов залга тахминан 15:16 да кириб келди. Бу вақтда бинода 70 нафарга яқин киши, жумладан 11 нафар судланувчи (иш бўйича жами 22 киши судланмоқда) ва 12 нафар адвокат йиғилди. Судланувчилардан бирининг адвокати мажлис олдидан судьяга журналистлар зални тарк этишини сўраб мурожаат қилди. У мазкур ишнинг оммавий ёритилишини истамаган ўз ҳимояси остидаги шахснинг айбсизлик презумпсияси масаласини тилга олди.
Сардор Содиқов журналистларга мажлисда иштирок этишни тақиқлай олмаслигини маълум қилди, бироқ ҳукм чиқарилгунига қадар ишни ОАВда ёритмаслик шартини қўйди. Унинг сўзларига кўра, ҳукм чиқарилганидан сўнг пресс-брифинг ташкил этилиб, жараён тафсилотлари маълум қилинади. «Газета.uz» мухбири эса суд мажлисининг очиқ экани, қонунчиликка кўра, очиқ суд мажлисларида иштирок этиш ҳамда жараённи ёритиш ҳуқуқига эга эканини таъкидлади.
Шу муносабат билан судья Содиқов жиноят ишлари бўйича Тошкент шаҳар суди раиси Бахтиёр Исломовнинг яқиндаги чиқишини эсга олди. Юнусобод туманининг собиқ ҳокими Бахтиёр Абдусаматов иши бўйича изоҳ берар экан, у барча ОАВ суд тартибида айби исботлангунига қадар айбсизлик презумпсиясига амал қилиши кераклигини қайд этиб ўтган эди.
«Ҳеч ким шахсни порахўр деб аташ ҳуқуқига эга эмас, у айбдор эмас деб ҳисобланади. Айрим оммавий ахборот воситалари эса айбсизлик презумпсиясига риоя қилмайди. Биз улардан қонунчилик билан танишиб чиқиш ва уларга риоя этишни талаб қиламиз», — деган эди судья Исломов. Шу билан бирга, Бахтиёр Исломов журналистлар Бахтиёр Абдусаматов иши бўйича очиқ суд мажлисларида эркин иштирок эта олишлари мумкинлигини таъкидлаганди.
Журналист ишни ёритиш вақтида ушбу тамойилга риоя этиш мақсадида эканини маълум қилди. Сардор Содиқов бошқа адвокатлар ва судланувчилардан ўзининг «Газета.uz» мухбирини залга қўймаслик тўғрисидаги илтимосини қўллаб-қувватлашини сўради. Улардан айримлари, жумладан залдаги кўпчилик одамлар унинг ғоясини маъқуллади.
Судья яна бир марта журналист мажлисда иштирок эта олишини, бироқ уни кейинчалик ёрита олмаслигини таъкидлади. Мухбир эса, шунга қарамасдан, суд мажлиси ҳақида ёзишини маълум қилди. Бу гапдан сўнг Сардор Содиқов унинг зални тарк этишига буйруқ берди. Асослар ҳақида сўзлар экан, у Жиноят-процессуал кодексига мурожаат қилиб, очиқ суд мажлисларида алоҳида шахсларнинг суд залида бўлишини тақиқлаш ҳуқуқига эга эканини таъкидлади.
Жиноят-процессуал кодексининг 19-моддаси (судда жиноят ишларининг ошкора кўрилиши)га мувофиқ, барча судларда жиноят ишлари ошкора кўрилади, бундан давлат сирларини қўриқлаш манфаатларига зид келадиган ҳоллар, шунингдек жинсий жиноятлар тўғрисидаги ишлар кўрилаётган ҳоллар мустасно. Суд мажлиси залида тартибни сақлаб туриш учун зарур бўлган ҳолларда, суд айрим шахсларнинг суднинг очиқ мажлисларида ҳозир бўлишини тақиқлашга ҳақли. Бироқ «Газета.uz» мухбири ҳеч қандай тартибларни бузгани йўқ эди.
Изоҳ (0)