«Ўзбекистон ошхонаси» бренди жаҳон миқёсида оммалаштириш режалаштирилмоқда

ЎзА «Ўзбекистон ошхонаси» брендини жаҳон миқёсида оммалаштириш ҳақида мақола чоп этди. Қуйида ушбу мақола тўлиғича ҳавола этилди.

Россиянинг TurStat таҳлилий агентлигининг маълумотларига кўра, Ўзбекистон гастрономик туризм йўналишида МДҲ ва яқин чет эл мамлакатлари рейтингида кучли бешликдан жой олган. Булар Грузия, Озарбайжон, Арманистон, Қозоғистон ва Ўзбекистон.

Биламизки, миллий таомларнинг тайёрланиш жараёни билан ўша таомларнинг ватанида танишиш сайёҳлар учун доим қизиқарли бўлиб келган.

Шу боис «Ўзбекистон ошхонаси» брендини жаҳон миқёсида оммалаштиришда жамоат ташкилотлари, хусусан, Ўзбекистон ошпазлар уюшмасининг ўрни алоҳида.

Ўзбек миллий таомларини дунёга танитиш, мамлакатимизга сайёҳлар оқимини кўпайтириш мақсадида, Ўзбекистон ошпазлар уюшмаси 2010 йилда Бутунжаҳон бош ошпазлар ҳамжамияти уюшмасига, 2017 йилда Бутунжаҳон Ислом давлатлари пазандалар уюшмасига аъзо бўлган.

Натижада, кўплаб хорижий фестиваль, саммит, мусобақа, ўзаро тажриба алмашиш ва шу каби бошқа тадбирларда иштирок этилиб, юксак марраларга эришилмоқда.

Хусусан, 2018 йилда National Geographic журнали ўтказган National Geographic Traveler мукофотида «Гастрономик туризм» номинацияси бўйича Ўзбекистон биринчи ўринни эгаллади.

Танловда иштирок этган респондентлар Ўзбекистон учун 34 фоиз, Италияга 21 фоиз, Озарбайжонга 17 фоиз, Францияга 13 фоиз, Жанубий Кореяга 5 фоиз овоз берган.

«Кўплаб сайёҳлар Ўзбекистонга мамлакатнинг ошхонаси, анъаналари ва маданияти билан танишиш учун ҳам келмоқда, — дейди Ўзбекистон ошпазлар уюшмаси раиси Акбар Умаров. — Туризмни ривожлантириш давлат қўмитаси туризм соҳасидаги жамоат ташкилотлари фаолиятига алоҳида эътибор қаратмоқда. Хусусан, гастрономик туризмни ривожлантириш ва оммалаштиришга қаратилган бир қатор лойиҳаларни амалга оширмоқдамиз.

Ўтган йили август ойида Туркияда бўлиб ўтган 33-Халқаро «Менген» фестивалида, 13 та давлат, жумладан, Германия, Нидерландия, Кипр, Озарбайжон, Малайзия, Украина, Миср, Босния ва Герцеговина, Саудия Арабистони ва бошқа давлатлар қаторида «Ўзбекистон» миллий ошхонаси стенди ташкил этилди ва мусобақада 3-ўринга сазовор бўлдик.

Айни вақтда уюшма Ўзбекистонга ташриф буюрган меҳмонларга ўзбек миллий таомларини тайёрлаш жараёнини намойиш этиш ва мастер-класслар ўтказишни йўлга қўймоқда. Жумладан, яқинда Америкадан келган бир гуруҳ сайёҳларга ўзбек миллий таомларини тайёрлаш бўйича мастер-класс ўтказилди. Шунингдек, америкалик машҳур блогер Сонни Садга маҳаллий балиқларимиздан турли таомлар тайёрлаш сирлари ўргатилди. Германиялик эксперт Ганс Карл Маделунг Ўзбекистонга ташрифи давомида Тошкент ресторанларида бўлиб, ўз мулоҳазаларини ёзиб қолдирди.

«Сезишимча, сизларда ошхонанинг жиҳозланишидан кўра рестораннинг ташқи ва ички дизайнига кўпроқ аҳамият қаратишар экан, — дейди сайёҳлардан бири. — Фақат яхши шароитдагина аъло даражали, мазали таом пишириш мумкин. Шу жиҳатдан қараганда, Тошкент ресторанлари жаҳон андозаларига унча мос келмас экан. Аммо аминманки, вақти билан бу нуқсонлар бартараф этилади.

«Бу каби муаммолар йиллар давомида йиғилиб қолган, жумладан, умумий овқатланиш корхоналари, ресторан, кафе ва бошқаларни халқаро стандартларга мослаштириш вақти келди, — дейди Ўзбекистон ошпазлар уюшмаси раиси Акбар Умаров. — Бироқ соҳада фаолият юритаётган корхона раҳбарлари жамоат ташкилотларининг ролини у қадар тушуниб етгани йўқ. Шу мақсадда, уюшмамиз ўз атрофида умумий овқатланиш корхоналарини бирлаштириб, хориждаги етакчи экспертлар иштирокида, Ўзбекистондаги ресторанларни жаҳон андозаларига мослаштирмоқдамиз. Бу жараёнда юртимизнинг пазандачилиги тарихига оид музей ташкил килиш менинг орзуим. Чунки ўзбек халқини бошидаги тожи, бу — пазандалик. Қолаверса, уюшмамизда музей учун жуда кўп материаллар бор.

«Шуни ҳисобга олиб, юртимизда бу йўналишда тарғибот-ташвиқот ишларини янада кучайтириш чоралари кўрилмоқда, — дейди Туризмни ривожлантириш давлат қўмитаси вакилли Санжар Рўзиев. — Бунда қўшимча сармоялар жалб этиш орқали инвестицион салоҳиятни кучайтириш, туризмнинг ноанъанавий турларини ривожлантириш ва янги иш ўринларини яратишда жамоат ташкилотларини ролини ошириш доимий эътиборда.