Ўзбекистон давлат санъат ва маданият институти талабалари, институт битирувчилари ва ўқитувчиларидан иборат ижодий гуруҳ 13 апрель куни Лондонга гастроль сафарига отланди. Бу ҳақда «Дарё»га Ўзбекистондаги Британия кенгаши матбуот хизмати маълум қилди.
Ўзбек тилидаги «Ҳамлет» спектакли 15 апрель куни Роуз Бруфорд коллежи саҳнасида халқаро театр симпозиуми доирасида тақдим этилади. Шу куннинг ўзида Ўзбекистоннинг Британия элчихонасида ҳам катта тадбир доирасида «Ҳамлет» спектакли намойиш этилади.
Британия кенгаши, Ўзбекистон давлат санъат ва маданият институти ҳамда Роуз Бруфорд коллежи ҳамкорлигида ўзбекистонлик талабалар британиялик режиссёр Жон Такер раҳбарлигида академик ўқув дастури доирасида ўзбек тилида «Ҳамлет» спектаклини саҳналаштирди.
Мазкур дастур Санъат ва маданият институти ҳамда Роуз Бруфорд коллежи ўртасидаги уч йиллик ҳамкорлик натижасидир. Актёрларни тайёрлаш, хусусан, Шекспир матни билан ишлашнинг халқаро тажрибасига таянган ҳолда саҳна маҳорати ва овозни созлаш сабоқларини ўзида жамлаган интеграллашган ёндашув ўз мевасини берди.
Саҳналаштириш жараёни ўз ичига барча босқичларни — кастинг, репетициялар, спектакл премераси ва Ўзбекистон шаҳарлари бўйлаб турни ўз ичига олди. Саҳналаштиришнинг мазкур муҳим босқичлари айни йўналиш бўйича ўқув дастурини модернизациялаш жараёни билан уйғунлашди.
Спектакл дастлаб Ўзбекистон санъат ва маданият институтида муваффақиятли намойишидан сўнг мамлакат бўйлаб қўйилди. Мана энди талабалар, институт битирувчилари ва ўқитувчиларидан ташкил топган «Ҳамлет» ижодий жамоаси жаҳон саҳнасида — Британияда спектаклни намойиш этишга йўл олди.
Изоҳ (0)