2019 йилда ўзбекистонлик ўқитувчилар «Росатом» техник академияси Россия университетлари билан биргаликда ўтказадиган ўқув курсларида ўқиш имкониятига эга бўлади, деб хабар берди «Дарё» мухбири Севара Нишонова.
16 апрель куни Сочи шаҳрида «Атомекспо-2019» XI Халқаро форуми доирасида «Росатом» техник академияси билан Ўзбекистон республикаси энергетика вазирлиги ҳузуридаги Атом энергетикасини ривожлантириш агентлиги («Ўзатом» агентлиги) ўртасида мақсадлар ҳақидаги келишув имзоланди.
Келишувни «Росатом» техник академияси ректори Юрий Селезнёв билан «Ўзатом» агентлиги бош директори ўринбосари Баҳром Мансуров имзолади.
Келишув орқали 2018 йилнинг 19 октябрида «Росатом» давлат корпорацияси, Ўзбекистон Республикаси Фанлар академияси ва «Ўзатом» агентлиги ўртасида имзоланган атом энергетикаси соҳасида ўқитиш ва кадрлар тайёрлашда ҳамкорлик қилиш тўғрисидаги меморандумни амалга ошириш бўйича кейинги қадамлар белгилаб берилди.
Гап энг аввало шу йил кузда очилиши кутилаётган ядро энергетикаси соҳасидаги Россиянинг етакчи ОТМ ММФИ ITЯУ нинг Тошкентдаги филиали учун ўқитувчилар тайёрлаш тўғрисида кетмоқда. Бундан ташқари, Ўзбекистон вакиллари «Росатом» техник академияси базасида ўтказиладиган дунёдаги биринчи АЭС нинг (Обнинск шаҳри) ишга туширилганига 65 йил тўлишига бағишланган халқаро конференциялар ва юбилей тадбирларида қатнашади.
Эришилган келишувлар доирасида томонлар томонидан Ўзбекистоннинг профил таълим ташкилотларига атом энергетикаси бўйича зарур ўқув адабиётларини тақдим этиш масалалари ҳам кўриб чиқилади.
«Техник академия атом энергетикасидан тинч мақсадларда фойдаланиш соҳасида кадрлар тайёрлаш, малакасини ошириш, АЭС дан фойдаланиш соҳасидаги энг яхши амалиётларни ўрганиш ва қўллаш, ядро ва радиация хавфсизлигини таъминлаш бўйича ноёб майдонча ҳамда университетлар билан ўзаро алоқалар бўйича ягона оператор бўлиб ҳисобланади. Ўзбекистон вакиллари илғор билимлар ва амалиётларни ўрганиш имкониятига эга бўлади»,— дея таъкидлади «Росатом» техник академияси« АНТ ҚПТ ректори музокаралар вақтида.
Изоҳ (0)