«Аср футболидаги асл қадрдонларим». Ахбор Имомхўжаевнинг 800 саҳифадан иборат футбол ҳақидаги янги китоби тақдимоти бўлиб ўтди (фото)

16 апрель, сешанба куни Миллий олимпия қўмитасида ўзбек спорт журналистикасига тамал тошини қўйган таниқли футбол шарҳловчиси, Ўзбекистонда хизмат кўрсатган ёшлар мураббийи Ахбор Имомхўжаевнинг «Аср футболидаги асл қадрдонларим» номли китоби тақдимоти бўлиб ўтди.

Муаллифнинг навбатдаги китоби ўзбек футболининг 100 йиллигига бағишлаб чоп этилди.

Тақдимот маросимида турли йилларда Ўзбекистон футбол федерациясини бошқарган Абдуҳошим Муталов (1992—95 йиллар), Зокиржон Алматов (1995—2005 йиллар) ва бугунги кунда Миллий олимпия қўмитаси президенти ва ЎФА биринчи вице-президенти Умид Аҳмаджонов, шунингдек, МОҚ ҳамда ЎФА раҳбарияти ва жамоаси, спорт фахрийлари, муаллифнинг яқинлари ҳамда ҳамкасблари, шунингдек, ОАВ вакиллари иштирок этди.

Китоб 800 саҳифадан иборат бўлиб, унда ўзбек футболига оид кўплаб тарихий материаллар, хотиралар, қизиқарли фактларни тақдим этилган. Китобда ўзбек футболи тарихида ёрқин из қолдирган 261 нафар шахс ҳақида қатор қимматли маълумотлар келтирилган. Тадбирда иштирок этган «Янги аср авлоди» нашриёти бош директори Эркин Абдураҳмонов китоб муаллифнинг 12 йиллик меҳнат маҳсули эканлигини таъкидлади.

Тақдимот маросимининг сўнгида Ахбор Имомхъожаев ўзбек футболининг ривожига қўшган ҳиссаси учун бир қатор фахрий инсонларга янги нашрдан чиққан китоби ва ўзи тайёрлаб келган эсдалик совғаларини ҳадя этди.