16-aprel, seshanba kuni Milliy olimpiya qo‘mitasida o‘zbek sport jurnalistikasiga tamal toshini qo‘ygan taniqli futbol sharhlovchisi, O‘zbekistonda xizmat ko‘rsatgan yoshlar murabbiyi Axbor Imomxo‘jayevning “Asr futbolidagi asl qadrdonlarim” nomli kitobi taqdimoti bo‘lib o‘tdi.
Muallifning navbatdagi kitobi o‘zbek futbolining 100 yilligiga bag‘ishlab chop etildi.
Taqdimot marosimida turli yillarda O‘zbekiston futbol federatsiyasini boshqargan Abduhoshim Mutalov (1992—95 yillar), Zokirjon Almatov (1995—2005-yillar) va bugungi kunda Milliy olimpiya qo‘mitasi prezidenti va O‘FA birinchi vitse-prezidenti Umid Ahmadjonov, shuningdek, MOQ hamda O‘FA rahbariyati va jamoasi, sport faxriylari, muallifning yaqinlari hamda hamkasblari, shuningdek, OAV vakillari ishtirok etdi.
Kitob 800 sahifadan iborat bo‘lib, unda o‘zbek futboliga oid ko‘plab tarixiy materiallar, xotiralar, qiziqarli faktlarni taqdim etilgan. Kitobda o‘zbek futboli tarixida yorqin iz qoldirgan 261 nafar shaxs haqida qator qimmatli ma’lumotlar keltirilgan. Tadbirda ishtirok etgan “Yangi asr avlodi” nashriyoti bosh direktori Erkin Abdurahmonov kitob muallifning 12 yillik mehnat mahsuli ekanligini ta’kidladi.
Taqdimot marosimining so‘ngida Axbor Imomx‘ojayev o‘zbek futbolining rivojiga qo‘shgan hissasi uchun bir qator faxriy insonlarga yangi nashrdan chiqqan kitobi va o‘zi tayyorlab kelgan esdalik sovg‘alarini hadya etdi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @daryo_sport’ga obuna bo‘ling!
Izoh (0)