Фарғонанинг Учкўприк туманида истиқомат қилувчи М.Қамбаров «эскича» ўқиб, фирибгарлик йўли билан 25 миллион сўмни ўзлаштиргани учун қўлга олинди, деб ёзади ЎзА.
Маълум бўлишича, кассалликдан даволаниш мақсадида С.Юсупов Фарғонанинг Учкўприк тумани, Сариқўрғон қишлоғида беморларни дуолар билан даволайдиган М. Қамбаров олдига келган.
Қамбаров унинг ишончига кириб, дуо ўқиб даволашини, кўзига чол ва момолар, жинлар кўринишини, жинлар билан гаплаштиришини айтиб алдаб, бу «иш» учун 50 миллион сўм сўраган. С.Юсуповнинг бунча пули йўқлигини билган М. Қамбаров унга пул топганда келишини айтиб қайтариб юборган.
Касалликдан тузалиш истагида бўлган С.Юсупов сохта табибнинг кирдикорларига учиб, жинлар билан гаплашиш учун 25 миллион сўм пулни олиб келиб, даволанишни бошлаган.
М.Қамбаров бу пулларни шахсий эҳтиёжлари учун ишлатиб юборган. С.Юсупов кўзига ҳеч қандай жинлар кўринмагани ва касаллигидан тузалмаганидан сўнг ички ишлар бўлимига мурожаат қилган.
М.Қамбаровнинг иши Жиноят ишлари бўйича Учкўприк туман суди томонидан кўриб чиқилиб, унга ЖКнинг 168-моддаси 2-қисми «а» банди билан 57-модда қўлланиб, энг кам ойлик иш ҳақининг 20 баравари миқдорида жарима жазоси тайинланган.
Судланувчига жазо тайинлашда айбига тўлиқ иқрорлиги, қилмишидан пушаймонлиги, оилавий шароити, 2-гуруҳ ногирони экани, муқаддам судланмагани, жабрланувчига етказилган моддий ва маънавий зарарларни тўлиқ қоплангани кабилар инобатга олинган.
Изоҳ (0)