Бокс. Ўзбекистонлик Равшанбек Умрзоқов филиппинлик рақибни 2-раундда нокаутга учратиб, чемпионлик камарини қўлга киритди

Профессионал бокснинг енгил (-61,23 кг) вазн тоифаси вакили ўзбекистонлик Равшанбек Умрзоқов (8 та ғалаба, 7 та нокаут) ўзининг навбатдаги жангида чемпионлик камари учун рингга чиқди. Бу ҳақда GoSport хабар берди.

13 апрель куни Молдова пойтахти Кишинёв шаҳридаги Енгил атлетика ёпиқ манежида бўлиб ўтган WBA Asia чемпионлик камари учун жангда Умрзоқов филиппинлик Роберто Гонсалесга (28 та ғалаба, 5 та мағлубият, 17 та нокаут) қарши рингга котарилиб, рақибини иккинчи раунддаёқ нокаутга учратди.

Натижада Умрзоқов фаолиятидаги дастлабки чемпионлик камарини қўлга киритди.

Эслатиб ўтамиз, Равшанбек Умрзоқов сўнгги марта 22 февраль куни Екатеринбургда бўлиб ўтган бокс оқшомида рингга чиқиб, бошқа бир филиппинлик боксчи Римар Метудани (12 та ғалаба, 5 та дуранг, 1 та мағлубият, 7 та нокаут) 4-раундда нокаутга учратганди.