Акционер инновацион тижорат «Ipak Yo‘li» банки BankExpo – 2019 миллий кўргазмасининг энг фаол иштирокчиларидан бири бўлди ва бир қатор инновацион банк маҳсулоти ва хизматларини тақдим қилди.
Стенд меҳмонларнинг эътиборини ўзига қаратди, негаки, банк хизматлари стенднинг ўзида тақдим этилди, шу билан бирга, ноёб акциялар ўтказилди.
«Биз нақд пул ечадиган, картанинг ҳисобини тўлдирадиган ҳамда долларни сўмга конвертациялайдиган банкомат ўрнатдик, – дейди АИT «Ipak Yo‘li» банки чакана бизнес департаменти бошлиғи Улуғбек Таваккалов. – Шу билан бирга, халқаро Visa карталарининг 30 дақиқа давомида берилишини йўлга қўйдик. Шу ернинг ўзида кредит эксперти ўтириб, аризалар қабул қилмоқда ва барча ҳужжатлар тақдим этилган тақдирда 2 соат ичида кредит бермоқда. Яна биз меҳмонларимизни янги мобил иловага улаб, уларга совға ва совринлар топширяпмиз».
«Ipak Yo‘li Mobile» мобил иловаси одатий банк хизматларини рақамли маконга ўтказади. Мижозларнинг смартфонлари ушбу оламга калит вазифасини бажаради.
BankExpo – 2019 кўргазмасида тақдим қилинган сўнгги янгиланиш –мобил иловада чиқариладиган «Виртуал карта» маҳсулоти. Виртуал карта ёрдамида банк мижозлари 3D-Secure технологияси ёрдамида ҳимояланган режимда интернет харидларини амалга оширишлари мумкин. Шу билан бирга, яқин орада бир мижознинг виртуал картасидан бошқа халқаро тўлов тизимларидаги карталарига маблағ ўтказиш имконияти яратилади.
Кейинги ҳафтада банк яна бир маҳсулот – «Золотая корона» пул ўтказмаларини ҳисобга туширишни йўлга қўйиш ниятида. Пул ўтказмасини қабул қилувчи мижоз банкка келмасдан, маблағни картасининг ҳисобига тушириши мумкин.
Реклама ҳуқуқи асосида
Изоҳ (0)