Тошкент вилоятида қасддан одам ўлдиришга уринишда айбланаётган талабанинг онаси эътироз билдирмоқда
Жорий йилнинг 7 апрель куни соат 01:30 ларда Янгийўл тумани «Аҳил» маҳалласида яшовчи А.А. (1993-й.т, Тошкент давлат аграр университетининг 3-босқич талабаси) шу маҳалладаги «Сенёр Помидор паста & ББҚ» кафеси олдида фуқаро Б.Х. (1992-й.т, ишсиз) билан рашк сабабли жанжаллашгани ва фуқаро А.А.га нисбатан Ўзбекистон Республикаси Жиноят кодексининг тегишли моддаси билан, яъни қасддан одам ўлдиришга суиқасд қилиш билан жиноят иши қўзғатилиб, тергов ҳаракатлари олиб борилаётгани ҳақидаги маълумот берилган эди.
Айни вақтда ЎзАга айбланувчининг онасидан шикоят келиб тушди.
«Ўғлим жабрланувчи билан таниш бўлмагани боис уни қасддан одам ўлдиришда айбланиши нотўғри. Уч фарзандни ҳам ота, ҳам она ўрнида тарбиялаб келяпман. Бу бола тўнғич фарзандим. У овқатланиш учун уйимиз ёнидаги кафега укаси билан кирган ва у ерда ҳеч қандай қиз бола бўлмаган. Қўшни туманда яшовчи йигит билан муштлашган, кейин пичоқбозлик бўлган. Жабрланган йигитнинг тепасида турибмиз, аҳволи яхши, ота-онаси тузалиб кетса, даъво қилмаймиз, дейишди. Тарқатилаётган маълумотларнинг тўлиқ асосланмагани ҳақида прокуратурага ва 1007 га шикоят қилдим. Суд-экспертизани қайта ўтказишга ваъда беришди. Ахир, не ҳасратда уч йилдан буён контракт – шартнома асосида ўқишига пул тўлаб келамиз, бахтсиз тасодиф туфайли, нотўғри маълумот тарқатиб, ўғлимни жувонмарг қилманглар», – дейди Шоҳиста опа.
Мазкур шикоят юзасидан Янгийўл туман прокуратураси қуйидагича изоҳ берган:
«Шикоятда келтирилган барча важлар тергов жараёнида ўрганиб чиқилади ва ҳолатларга аниқлик киритилади. Ҳозирча жиноят процессуал талабларига кўра, терговнинг маълумотларини ошкор қилиш мумкин эмас».
Бундай изоҳ эса айбланувчининг онасини қаноатлантирмай, эътирозига сабаб бўлмоқда.
«Унда нега суриштириш ишлари охирига қадар олиб борилмай, суднинг қарори чиқмасдан, воқеа жойидаёқ ўғлимни қасддан одам ўлдиришда айблашди. Ва буни ОАВда эълон қилишди, бунга ким жавоб беради? Ўғлимни қамалишидан ким манфаатдор?»
