Кембриж университетининг етакчи тадқиқотчиси, замонавий Ғарб зиёлиларининг ёрқин вакили, Ўзбекистоннинг яқин дўсти Ширин Акинер 76 ёшида оламдан ўтди. Бу ҳақда ЎзА хабар берди.
Шу муносабат билан олимани таниган ва билган замондошларимиз ижтимоий тармоқларда ўз таъзияларини билдириб, у қолдирган илмий меросни эътироф этмоқда.
Лондон университетининг профессори Ш.Акинер 1990 йиллардан бошлаб бугунги кунга қадар Марказий Осиё ҳаётига оид илмий изланишлар олиб бораётган, кўзга кўринган экспертлар сирасидан эди. У Ўзбекистон, Қозоғистон ва Тожикистон ҳақидаги юзлаб илмий асарлар ҳамда мақолаларга муаллифлик қилган. Уларда минтақадаги сиёсий ва ижтимоий вазият, хусусан, маданият ва дин билан боғлиқ масалаларга эътибор қаратилади.
Ш.Акинер 2005 йилда содир бўлган Андижон воқеалари тўғрисида Жонс Хопкинс ва Уппсала университетларида ўзининг мустақил тадқиқоти натижаларини нашр қилдирган. Лондонлик олима ўша даврда Андижонга шахсан ташриф буюриб, маҳаллий аҳолининг турли қатламлари вакиллари билан бевосита суҳбат ўтказган.
Эътиборли жиҳати шундаки, ушбу эксперт Ғарбда, жумладан, Лондонда ҳам мазкур ҳодисани олдиндан билганлар бўлганлигига тўғридан-тўғри ишора қилганди.
Ш.Акинер кейинги йилларда минтақага ихтисослашган ихтисослашган Journal of Central Asian and Caucasian Studies журналининг таҳрир ва маслаҳатчилар кенгаши аъзоси ҳисобланарди.
Беруний Алимов, ЎзDJТУ доценти: Профессор Ширин Акинер кейинги 25-30 йил давомида Ўзбекистоннинг яхши-ёмон кунларида ҳар доим бирга бўлиб келаётган Ғарбнинг энг таниқли олимаси эди.
Опани шахсан 1996 йилдан танирдим. Турли илмий ва сиёсий мавзуларда суҳбатлашиб турардик. Яқинда Тошкентда ҳам халқаро анжуман баҳонасида кўришдик. Охирги бор кўришганимизда Ўзбекистоннинг имиджи масаласида бафуржа суҳбатлашдик.
Кейин бу борада ўзлари ёзган ва ҳали ҳеч жойда эълон қилинмаган илмий мақоланинг драфт вариантини юборгандилар. Ўқиб ҳайратландим.
Неъматулло Мирсаидов, медиа эксперт, Тожикистон: Ажойиб аёл, ҳеч нарсадан қўрқмайдиган, Ғарбда кўп ҳам учравермайдиган ақл эгаси эди. Виждонини сиёсатга сотмас, мамлакатни мавжуд сиёсий тизим баҳонасида дунё сиёсатидан олиб қочишни ёқламас эди.
Виктория Панфилова, «Независимая газета» мухбири, Россия: Биз бир ой олдин Тошкентда учрашиб, суҳбатлашган эдик. Афсуски, бундай йўқотишни тасаввур ҳам қилмагандим. Яқин кунларда унга қўнғироқ қилишни режалаштираётган эдим. Гапимиз охирига етмай қолди.
Маруса Хосилова, журналист: Аллоҳ раҳматига олган бўлсин. Ўзбекистонни яхши кўрганларни биз ҳам яхши кўрамиз!
Изоҳ (0)