Бир ҳафта давомида онлайн аукцион орқали 500 дан зиёд автомобиль рақамлари сотилди
1−7 апрелга қадар бўлган давр мобайнида онлайн аукцион орқали 536 та автомобиль рақамлари сотилди. Бу ҳақда Spot хабар берди.
Сотилган давлат рақам белгиларининг умумий суммаси 2,1 миллиард сўмдан ортиқни ташкил қилган.
Рақобатли савдолар натижасида битимларнинг қарийб 22% биринчи тоифадаги авторақамларга, 49% иккинчи ва 29% учинчи тоифа авторақамларга тегишли.
Харидорлар таркибида етакчиликни Тошкент шаҳри ва Тошкент вилояти автоҳаваскорлари эгаллаган ва уларнинг тузилган битимлар сонидаги улуши 20% га тенг. Иккинчи ўринда Самарқанд вилоятининг автоҳаваскорлари 14% улуш билан жойлашган.
Кейинги ўрин Наманган ва Хоразм вилоятларининг автоҳаваскорларига тегишли бўлиб, ҳар бирининг улуши 12% ни ташкил қилган. Қолган ҳудудларнинг улуши 42% га тенг.
