Қозоғистонлик журналист Данара Курбанова Facebook’даги саҳифасида Ўзбекистонга қилган саёҳатидан олган таассуротлар билан бўлишгани ҳақида хабар берилган эди.
Маълум бўлишича, у ҳамроҳлари билан тушдан кейин ош қилинадиган ресторанни тополмай, шаҳарда адашиб юрган вақтида, тасодифан Яккасарой тумани ҳокими Бахтиёр Шомуродовга дуч келган. Унинг кимлигини билмаган ҳолда, сайёҳлар ундан миллий таомлар ресторанини тавсия қилишни сўраган. Ҳоким уларга ўз тавсиясини бериб, таксига ҳам миндириб юборган, такси пулини тўлаб қўйишни ҳам унутмаган. Бундан ноқулай ҳолатга тушган сайёҳларга эса улар бу ерда меҳмон эканлигини айтиб, «бир куни ўз ватанингизда ўзбекларни учрацангиз, уларга ҳам яхшилик қиларсиз», — деган.
Данаранинг ушбу постидан сўнг, айрим интернет фойдаланувчилари журналистга айнан шундай сўзларни ёзиш учун пул тўлангани ҳақида ёзиб қолдирган эди.
Журналист ўзининг Facebook’даги саҳифасида ушбу ҳолатга изоҳ берди:
«Кеча мен ўзбек журналистларига ҳоким билан боғлиқ вазият юзасидан изоҳ бердим. Изоҳни шу ерда ҳам ёзиб қолдиришим мумкин:
Ўзбекистонга ташрифим олдидан мамлакат ҳақида ёзилаётган гап-сўзларни ўқигандим. Интернетда Ўзбекистонда рус тилида сўзлашувчи инсонлар жуда кам эканлиги, бу ерда эҳтиёт бўлмаса катта пулга тушиб қолиш ҳақида гап кетган нохолис мақолаларга кўп дуч келдим.
Ўзбекистонга келганимда эса бу ҳолатнинг аксига дуч келдим: Ҳақиқатдан яхши нарсалар кўп экан.
Мен Facebook’да ўз кўрган-кечирганларимни ёзиб қолдираман, мен блогер эмасман. Audiториям ҳам унчалик катта эмас, катта аудитория ортидан қувмайман ҳам. Саҳифам-саёҳат қилишни ёқтирувчи инсонларга мўлжалланган. Агар одамларга бирон нарса ёқмаса, улар маълум ҳолат ҳақида турли уйдирмаларни ўйлаб топади. Улар шунчалик аҳмоқона ва кулгилики, шунинг учун улар ҳақида гапирмайман. Айтмоқчи бўлганим: мен, балки Ўзбекистоннинг ‘пиарчиси’ бўлишига қарши ҳам эмасман, аммо афсуски менга ҳеч ким пул тўламайди. Мен Тошкентдаги диққатга сазовор масканлар ҳақидаги мақолам учунгина пул оламан. Аксинча, мен Тошкентда касодга учрасам керак: Яқинда Чорсунинг ярмини олиб кетаман. Нима қилай, сизларда ҳамма нарса чиройли!», — деб ёзади журналист.
Данара Тошкент унинг учун қадрдон шаҳар эканлиги, онаси ва бувиси маълум муддат шу шаҳарда яшагани ҳамда Москвага янги кўчиб борганида тошкентликлар унга шаҳарга мослашишга ёрдам берганини ҳам ёзиб қолдирган.
Журналистнинг ёзишича, унинг Ўзбекистондаги саёҳати давом этмоқда.
Изоҳ (0)