Олий суд Фарғонада ўтказган сайёр қабулда фирибгарликда айбланган 3 киши суд залида қамоқдан озод қилинди
5—6 апрель кунлари Фарғона вилоятининг Марғилон, Фарғона шаҳарлари ва Данғара тумани Халқ қабулхоналарида Олий суд раисининг ўринбосари Холмўмин Ёдгоров ва Олий суд судьялари аҳолининг жиноий, фуқаролик, маъмурий ва иқтисодий судларга оид мурожаатлари юзасидан сайёр қабуллар ўтказди. Бу ҳақда «Дарё» мухбири хабар бермоқда.
Сайёр қабуллар давомида 125 нафар фуқаронинг мурожаати тингланди. Шундан 34 кишининг аризаси назорат тартибида қабул қилинди ва 91 кишига шикоят қилиш тартиби ва муддатлари, авф этиш бўйича мурожаат тартиби юзасидан ҳуқуқий тушунтириш берилди. 2 та оила яраштирилди.
Маҳалла раислари, нотинч оилалар ва жазони ижро этиш муассасидан озод қилинган, ҳозирда озодликдан маҳрум қилиш билан боғлиқ бўлмаган жазоларни ўтаётган, муқаддам судланган шахслар, озодликдан маҳрум қилиш жазосини ўтаётган шахсларнинг яқин қариндошлари билан суҳбатлар ўтказилди.
Жиноят ишлари бўйича Қўштепа тумани суди томонидан Жиноят Кодексининг 168-моддаси билан айбланган 3 нафар фуқаронинг жиноят иши сайёр суд мажлисида кўриб чиқилди. Судланувчиларнинг оилавий аҳволи, улар томонидан етказилган моддий зарар қопланганлигини инобатга олиниб, уларга озодликдан маҳрум қилиш билан боғлиқ бўлмаган жазо тайинланиб, суд залида қамоқдан озод қилинди.
Сайёр қабул кунлари ахлоқ тузатиш ишлари ва озодликни чеклаш жазосини ўтаётган 17 нафар шахс Жиноят кодексининг 73-моддаси тартибида ўталмай қолган жазо муддатидан шартли равишда озод қилинди.
Қ.И. исм-шарифли аёл Фарғона шаҳрида яшайди. У 2017 йилда қонунга хилоф равишда чет элга чиқиш ёки Ўзбекистонга кириш жиноятини содир этган. Унга суд ҳукми билан 2 йил муддатга ахлоқ тузатиш ишлари жазоси тайинланган. Сайёр қабул давомида Қ.И. қилмишидан пушаймонлиги, жазодан ўзига тегишли хулоса чиқаранлигини билдириб, жазодан муддатидан олдин озод қилиш ҳақида мурожаат қилди.
Шу куни унга оид материал жиноят ишлари бўйича Фарғона шаҳар суди томонидан кўриб чиқилди. Жазо муддатини ўташ тартиби бузилмаганлиги, яшаш жойидан ижобий тавсифланганлиги эътиборга олиниб, ахлоқ тузатиш ишлари жазосининг ўталмаган 1 йилидан муддатидан илгари шартли озод қилинди.
