Исроил Мадримов WBA янгиланган рейтингида уч поғона юқорилади, Шоҳжаҳон Эргашев эса ўз ўрнида қолди

Бутунжаҳон бокс ассоциацияси (WBA) профессионал боксчиларнинг янги рейтингини эълон қилди. Бу ҳақда GoSport хабар берди.

Супер ярим ўрта (-69,85 кг) вазн тоифаси вакили Исроил Мадримов (2 та ғалаба, 2 та нокаут) март ойи рейтингида уч поғона юқорилаб 6-ўриндан жой олди. Эслатиб ўтамиз, Исроил 10 март куни WBA Intercontinental чемпионлик камарини ҳимоя қилиш учун венесуэлалик боксчи Фрэнк Рохасга (24 та ғалаба, 2 та мағлубият) қарши рингга кўтарилиб, рақибини 2-раунднинг ўзидаёқ нокаутга учратганди.

Янгиланган рейтингда иккинчи ярим енгил (-55,34 кг) вазн тоифасида рингга чиқаётган Муроджон Аҳмадалиев (5 та ғалаба, 4 та нокаут) 1-ўринда қолди ва жаҳон чемпионлик камари учун бирламчи даъвогар номини сақлаб қолди.

Шунингдек, супер енгил (-63,5 кг) вазн тоифасида битта жанг ўтказган Шоҳжаҳон Эргашев (16 та ғалаба, 14 та нокаут) эса рейтингда 4-ўринни эгаллаган.