Шавкат Мирзиёев 7 март куни Иқтисодий ҳамкорлик бўйича Ўзбекистон—Россия ҳукуматлараро комиссияси ҳамраиси, Россия иқтисодий ривожланиш вазири Максим Орешкинни қабул қилди. Бу ҳақда Президент матбуот хизмати маълум қилди.
Давлат раҳбари меҳмонни самимий қутлар экан, Ўзбекистон билан Россия ўртасидаги дўстлик, стратегик шериклик ва иттифоқчилик муносабатлари, шунингдек, кўп қиррали амалий ҳамкорлик жадал ривожланиб, изчил мустаҳкамланиб бораётганини катта мамнуният билан қайд этди.
2018 йил якунларига кўра ўзаро савдо ҳажми 20 фоизга ошиб, қарийб 6 миллиард долларга етди. Россиянинг етакчи компания ва банклари иштирокида, жумладан, энергетика, нефть-газ, кимё, машинасозлик, электротехника, тўқимачилик, озиқ-овқат ва кўплаб бошқа тармоқларда йирик инвестиция лойиҳалари амалга оширилмоқда.
Ўзаро мулоқотнинг янги кўп даражали формати, яъни икки давлат бош вазирлари даражасидаги икки томонлама ҳамкорлик бўйича қўшма комиссиянинг ташкил этилиши кўп қиррали шерикликни кенгайтириш бўйича эришилган келишувлар самарадорлигини ошириш ва уларни ўз вақтида рўёбга чиқаришга хизмат қилиши таъкидланди.
Ўзаро ҳамкорликнинг истиқболли йўналишлари қаторида мамлакат ҳудудларида Россия компаниялари иштирокида агрокластерлар ва логистика марказларини ташкил этиш, Ўзбекистон мева-сабзавот ва тўқимачилик маҳсулотларини Россия бозорига йирик ҳажмда улгуржи етказиб бериш бўйича янги тизимни жорий этиш, ҳудудлараро ҳамкорликни янада мустаҳкамлаш учун қулай шароитлар яратиш, соғлиқни сақлаш ва таълим соҳаларида ўзаро алмашинувларни кенгайтириш ва қўшма лойиҳаларни амалга ошириш қайд этилди.
Россия иқтисодий ривожланиш вазири давлат раҳбарига самимий қабул учун миннатдорлик билдириб, Россия президенти Владимир Путин ҳамда ҳукумат раиси Дмитрий Медведевнинг саломи ва энг эзгу тилакларини етказди.
Максим Орешкин Ўзбекистонда мамлакатнинг барқарор тараққиётини таъминлаш, иқтисодиётни либераллаштириш ва ишбилармонлик муҳитини яхшилаш, инвесторларни ва тадбиркорлик ташаббусларини қўллаб-қувватлаш борасида амалга оширилаётган кенг миқёсли ислоҳотларни юксак баҳолади.
Россия ўзаро савдо ҳажмини ошириш ва номенклатурасини кенгайтириш, турли соҳаларда истиқболли қўшма инвестиция лойиҳаларини амалга ошириш учун бундан буён ҳам зарур чоралар кўришга тайёр экани таъкидланди.
Изоҳ (0)