Марказий банк пул қийматини ўзгартиришга (деноминация) эҳтиёж сезмайди. Бу ҳақда Марказий банк бошқаруви раиси Мамаризо Нурмуратов 5 март, сешанба куни бўлиб ўтган брифингда маълум қилди, деб ёзади Spot.
Унинг сўзларига кўра, ҳозирча деноминацияни амалга ошириш режалаштирилмаяпти. Бугунги кунда амалда бўлган белгиланган қийматлар барча талабларга жавоб беради ва улардан фойдаланиш қулай.
«Деноминация осон ва тезда амалга оширилиши мумкин бўлган техник жараёндир», — дейди Марказий банк раиси.
Халқаро валюта жамғармаси миссияси бошлиғи Альберт Егер ўтган йил 50 фоизни ташкил этган кредитлашнинг ўсиши Ўзбекистон иқтисодиётига кучли таъсир кўрсатиши мумкинлиги ҳақида огоҳлантирди. «Кредитлашнинг ўсишини чеклаш жуда муҳимдир. Агар у сақланиб қолмаса, инфляцияга зиён етказиши ва ташқи камомадни янада кучайтириши мумкин», — дейди Егер.
Мамаризо Нурмуратов ХВЖ вакилига жавобан Марказий банк ва ҳукумат йиллик кредитлаш ҳажмини 25 фоизга қисқартириш имкониятини муҳокама қилаётганлигини таъкидлади.
Халқаро Валюта Жамғармаси Ўзбекистоннинг иқтисодий ўсиши бу йил 5,5 фоизни ташкил этиши ва 2020 йилда 6 фоизгача ўсиши мумкинлигини прогноз қилмоқда. Бунинг асосий сабаби — инвестициялар оқими бўлиб, шунингдек, нархларни либераллаштириш давом этаётганлиги сабабли мамлакатда инфляция юқори бўлиб қолади — тахминан 15 фоиз даражасида.
Изоҳ (0)