Энг яхши болалар қаҳрамони ва қаҳрамонлар гуруҳи аниқланди

4 март куни Ўзбекистон Республикаси Мактабгача таълим вазирлиги ҳамда Ўзбекистон Республикаси Президенти Администрацияси ҳузуридаги Ахборот ва оммавий коммуникациялар агентлиги ҳамкорлигида ўтказилган «Энг яхши болалар қаҳрамони/қаҳрамонлар гуруҳи» кўрик-танлови якунланди. Бу ҳақда вазирлик матбуот хизмати хабар берди.

Мазкур танлов мактабгача таълим материалларини ўргатувлар учун энг яхши болалар қаҳрамонини яратиш мақсадида ташкил этилган бўлиб, унга 270 нафар ижодкордан мингдан зиёд иш келиб тушган.

Асарларнинг 17 таси кўрик-танловнинг якуний – финал босқичида қатнашиш ҳуқуқини қўлга киритган. Финалчиларнинг 10 нафари онлайн овоз бериш йўли билан сараланган бўлса, қолган 7 нафари ташкилотчилар томонидан танлаб олинган.

Финал босқичида иштирокчиларнинг ишларини Мактабгача таълим вазирлиги мутасаддилари, Ахборот ва оммавий коммуникациялар агентлиги мутахассислари, таниқли санъаткорлар, дизайнерлар ҳамда блогерлар баҳолаб борди.

Ҳакамлар ҳайъати баҳоларига асосан, биринчи ўрин 172 балл тўплаган Тоҳир Исломовга насиб этди. Унинг «Буюк болакайлар» персонажи энг яхши иш деб топилди ва муаллиф ташкилотчилар томонидан 10 миллион сўм пул мукофотига эга бўлди.

Иккинчи ўринни Хуршид Турсунбоев эгаллади. У яратган «Турсунбой ва Қўчқорвой» персонажи ҳакамлар томонидан 152 баллга лойиқ кўрилди. Муаллифга ташкилотчилар томонидан 6 миллион сўм пул мукофоти топширилди.

Учинчи ўрин Лейла Мўминовага насиб этди. Унинг «Анора» персонажи 145 балл тўплаб, 4 миллион сўм пул мукофоти билан тақдирланди.

Натижалар тез кунларда Мактабгача таълим вазирлигининг www.mdo.uz сайтида эълон қилинади.