«Дарё» таҳририятининг Telegram’даги манзилига юборилган мурожаатларнинг бирида Ғузор туман электр таъминоти корхонаси ёнидаги узундан узоқ навбатлар тилга олинади. Гап исботи билан деганларидек, мурожаатчи мурожаатига узоқ навбатлар акс этган фотосуратларни ҳам илова қилган.
Мурожаатчи қай даражада ҳақ эканлигини билиш мақсадида Ғузор туманига йўл олдик.
25 февраль куни соат 10:00 да туман электр таъминоти корхонасида бўлганимизда, ҳақиқатдан ҳам электр тармоқлари корхонаси ёнидаги дарчада чамаси 40–50 нафар кишидан иборат навбат юзага келганлигига гувоҳ бўлдик.
Навбатда турган кишиларни суҳбатга чорлаймиз.
«Йил бўйи шу аҳвол, — дейди тумандаги «Янгиҳаёт» маҳалласидан келган истеъмолчи Нафиса Носирова. – Ҳар 20 кун ёки бир ойда пул тўлаш учун келаман, бирор марта ҳам навбатсиз ишим битмаган. Ҳар сафар узундан узоқ навбатда турамиз».
Ўзини Улаш Қурбонов дея таништирган истеъмолчининг айтишича, электр токи учун пластик карточкага пул тўлаш муаммо эмас, почтанинг 4–5 нафар кассирлари доимий равишда ишлаб туришади.
«Ҳамма гап «загрузка»да, — дейди Улаш Қурбонов. – Кассага пул тўлаб қайтганимиздан кейин, пулни «загрузка» қилиш учун бир кунлаб кутган пайтларимиз бўлади. Ҳар сафар шу муаммодан азият чекамиз. Бу ҳолат 2016 йилдан бери бор. Наҳотки, раҳбарлар шу муаммони ҳал этиш учун дарчага битта ходим эмас, 2–3 нафар ходим қўйиш иложисини қилишолмаса?»
Истеъмолчилардан яна бири Тўйчи Бўроновнинг сўзига кўра, «загрузка» учун камида бир соат вақт кетади. «Баъзан эса 2–3 соатлаб шу ерда қолиб кетамиз, уруш-жанжал бўлади, — дейди Тўйчи Бўронов. — Бақир-чақир, аёллар ёш болаларини ташлаб келишади. Шу ҳолатларни электр таъминоти корхонаси раҳбари ҳам кўриб турибди-ку. Нега жим туриб кузатмоқда?»
«Илгари халқ пул тўламайди дейишарди, энди халқ пул тўлаш учун навбатда турибди, — дейди Илҳом Ботиров исмли истеъмолчи. – Шундай экан, халқ учун ҳам шароит яратиш керак-да. Бор-йўғи битта «загрузка» қиладиган жой бор. Соатлаб навбатда туриб, вақтимиз беҳуда кетяпти. «Свет»га 30 минг сўм тўлаш учун бир кун вақт сарфлаймиз».
«Электр таъминоти корхонаси раҳбарига ҳам бу ҳақда айтдик, — дейди Манзура Мажидова. – Аммо ҳеч қандай ҳаракат йўқ. Бизни тинглашмайди ҳам. Лекин бориб текширишни жуда яхши билишади. 4–5 та «загрузка» қиладиган жой қилиб қўйишсин. Муаммо бўлмайди».
«Тўланган пулни пластик карточкага юклаш учун навбат юзага келаётгани ҳақида вилоятга ҳам билдирганмиз, — дейди Ғузор туман электр таъминоти корхонаси раҳбари Эркин Пардаев. – Бизда «загрузка» қиладиган 2 та ускуна бор эди. Бири куйиб қолди. Бунга ҳам икки ой бўлди».
Эркин Пардаевнинг айтишича, туман электр таъминоти корхонаси «Қашқадарё ҳудудий электр тармоқлари» АЖга 2018 йил 12 ноябрь куни билдирги берган. Bildиргида туман электр таъминоти корхонаси Ғузорда пластик карточкали ҳисоблагич ўрнатган истеъмолчилар сони 12 225 нафарга етганлигини маълум қилиб, навбат юзага келиши аҳоли эътирозига сабаб бўлаётгани айтилган ва туманни 2 дона IC CARD «загрузка» аппарати билан таъминлаш сўралган.
Эркин Пардаев «Дарё» мухбирининг «Мазкур мурожаатга мутасадди ташкилот қандай жавоб берди, муаммо қачон бартараф этилар экан?» деган саволига «Жавоб беришди, албатта» дейишдан нарига ўтмади. Нима деб жавоб беришган, муаммо қандай бартараф этилади бу ҳақдаги саволларимизга Эркин Пардаевдан тайинли жавоб ололмадик.
«Қашқадарё ҳудудий электр тармоқолари» АЖ билан ушбу масала юзасидан боғланганимизда, телефонга жавоб берган ходим раҳбарият туманлар билан селектор мажлиси ўтказаётганини, тез орада ушбу масалага масъул бўлган мутасадди қўнғироқ қилиб, бу ҳақда маълумот беришини айтди. Бироқ бизга ҳозирча бу хусусида ҳеч ким ҳеч қандай маълумот бермади.
Изоҳ (0)