Германия маҳаллий телекомпаниялар Ассоциацияси президенти, эксперт Рене Фалкнер билан «Ўзбекистон тарихи» телеканали яратилиши бўйича учрашув бўлиб ўтди. Бу ҳақда Республика Маънавият ва маърифат маркази Матбуот хизмати вакили Зебо Нурмонова «Дарё»га маълум қилди.
Президент Шавкат Мирзиёев Олий Мажлисга Мурожаатномасида Ўзбекистон Миллий телерадиокомпанияси таркибида «Ўзбекистон тарихи» телеканали ташкил этилишини маълум қилган эди. Шунингдек, давлати раҳбари мамлакат келажагига йўналтирилган улкан вазифаларни амалга оширишда куч-қудрат манбаи – миллий ғояни ривожлантириш масаласига эътибор қаратиб, Ўзбекистоннинг қадимий ва бой тарихини ўрганиш, бу борада илмий-тадқиқот ишларини кучайтириш зарурлигини таъкидлаган эди.
Германиялик мутахассис «Ўзбекистон тарихи» телеканали яратилиши бўйича таклиф ва тавсияларини билдириб, телеканал фаолияти йўлга қўйилгунга қадар ўзбекистонлик мутахассисларга турли семинар-тренинглар, давра суҳбатлари ташкил этиб, амалий ёрдам беришини айтиб ўтди.
Учрашувга ҳамоҳанг тарзда Бугун Республика Маънавият ва маърифат маркази ҳамда Конрад Аденауэр номидаги халқаро хайрия жамғармасининг Марказий Осиё бўйича минтақавий ваколатхонаси билан ҳамкорликда ушбу телеканал яратилиши, функцияси, унда халқаро тажрибаларни қўллаш бўйича яна бир тадбир ташкиллаштирилди.
Унда хорижлик мутахассислар, муҳаррир ва режиссёрлар, техник ходимлар иштирок этиб, телеканални оммалаштириш, халқаро тажрибаларни қўллаш, мутахассисларни кенг жалб этиш бўйича фикр алмашилди.
Учрашув сўнгида журналистлар томонидан берилган саволларга мутахассислар жавоб қайтарди.
Изоҳ (0)