Қашқадарё вилоятининг Нишон ва Муборак туманида фаолият юритувчи корхона ходимлари туман Адлия бўлимларига иш ҳақларини ўз вақтида ололмаётганидан шикоят қилгач, Адлия бўлимлари аралашуви билан ишчи-ходимлар иш ҳақи ундириб берилган. Бу ҳақда «Дарё»га вилоят Адлия бошқармаси матбуот хизмати маълум қилмоқда.
Маълум бўлишича, Нишондаги Туман йўллардан фойдаланиш унитар корхонасининг ишчи ходимлари иш ҳақларини ўз вақтида ололмаётганидан шикоят қилгач, муаммога туман Адлия бўлими аралашган. Унитар корхона ишчи-ходимларининг Адлия бўлимига маълум қилишича, корхона раҳбарияти ишчиларнинг 2018 йил декабрь ойидан қолган иш ҳақини ҳар хил баҳоналар билан бермай, ортга суриб келаётган бўлган. Адлия бўлими ходимларининг ушбу мурожаат юзасидан унитар корхонада олиб борган ўрганиш натижаларига кўра, ҳақиқатдан ҳам корхонанинг 42 нафар ишчи-ходимларидан қарзи борлиги аниқланган. Адлия бўлимининг унитар корхона раҳбариятига 2019 йил 4 февраль куни киритган тақдимномасига кўра, жорий йилнинг 21 февраль куни ушбу ишчи ходимларнинг 35 830 000 сум иш ҳақи ундириб берилган.
Шунингдек, Муборак туман Адлия бўлими томонидан туманда жойлашган «Қашқадарёқурилишинвест» унитар корхонасида сайёр қабул ўтказилганда, «Қашқадарёқурилишинвест» унитар корхонаси 27 нафар ишчи-ходимларининг 206 миллион сўмлик иш ҳақи ҳалигача берилмай келинаётганлиги аниқланган. Адлия бўлими томонидан 27 нафар ишчи-ходимларнинг манфаати кўзланиб, жами 206 миллион сўмни ундириш бўйича Фуқаролик ишлари бўйича Косон туманлараро судига ариза киритилган. Натижада ишчиларнинг 206 миллион сўмлик иш ҳақини ундириш буйича суд ҳукми чиқарилиб, ижрога қаратилган.
Изоҳ (0)