Baring Vostok ишининг барча фигурантларига айбловлар эълон қилинди

«Восточный» банкидан 2,5 миллиард рубль ўғирлаш иши бўйича барча фигурантларга айбловлар эълон қилинди. Бу ҳақда Baring Vostok асосчиси Майкл Калвининг адвокати Дмитрий Клеточкин маълум қилди, деб ёзади «Коммерсантъ».

Мазкур иш бўйича жами олти киши: Майкл Калви, Baring Vostok’нинг ҳамкори Ваган Абгарян, молиявий сектор саноати бўйича фонднинг ҳамкори Филипп Дельпаль, инвестициялар бўйича директор Иван Зюзин, ‘Восточный’ банкининг собиқ бошқарув раиси Алексей Кордичев ва ‘Биринчи коллекторлик бюроси’ бош директори Максим Владимиров айбланмоқда.

Тергов версиясига кўра, банкирлар «Биринчи коллекторлик бюроси»нинг 2,5 миллиард рубль қарзини «Восточный» учун фойдали бўлмаган шароитларда тартибга солиш учун тил бириктирган. Банк компенсация тариқасида IFTG’нинг 59,9 фоиз акцияларини қўлга киритган. Акциядорлар мажлисида ушбу фирма активларининг қиймати 3 миллиард рублни ташкил этиши маълум қилинган. Бироқ тергов уларнинг қиймати 600 минг рублга тенг деб ҳисобламоқда.

Барча фигурантлар 13 апрелга қадар ҳибсга олинган. Улар ўз айбини рад этмоқда.

Эслатиб ўтамиз, аввалроқ Майкл Калви Шерзод Юсуповни алдаганликда гумон қилинаётганлиги хабар қилинган эди.