Қашқадарё вилоятининг Шаҳрисабз туманидаги Кўл қишлоғида ўтган 2–3 йил давомида бирор марта ҳам оилавий ажрим ёки оилавий низолар учрамаганлиги айтилмоқда. Бу ҳақда Қашқадарё вилоят Хотин-қизлар қўмитасининг тарихда биринчи маротаба ўтказилган матбуот брифингида айтиб ўтилди.
Матбуот брифингида Шаҳрисабз туман хотин-қизлар қўмитаси раиси Муҳайё Алмирзаеванинг маълумот беришича, мазкур қишлоқда яшовчи 1302 нафар аҳолининг 650 нафарга яқини хотин-қизлар бўлиб, қишлоқда 301 та оила мавжуд. «Мазкур қишлоқ аёллари билан суҳбатлашиш учун борганимизда, қишлоқ аёлларининг турмуш ўртоғига нисбатан итоаткорлигини кўриб ҳавасимиз келди, — дейди Муҳайё Алмирзаева. – Улардан ўрнак олсак бўлар экан».
Вилоят хотин-қизлар қўмитаси, брифингда «Дарё» мухбирининг «Қалин қор ёғса ташқи дунёдан узилиб қоладиган Шаҳрисабзнинг Кўл қишлоғидаги аёллар муаммоси қандай ҳал этилмоқда? 2016 йил ҳомиладор аёлнинг туғуруқ пайтидаги ўлими ҳолати такрорланмаслиги учун қандай ишлар қилинаётганлиги хусусидаги саволига жавобан вилоят ҳокими Зафар Рўзиевнинг бу хусусда махсус топшириғи борлигини, Кўл қишлоғи аҳолиси, айниқса аёллар саломатлигига алоҳида эътибор қаратиш мақсадида қишлоқ аҳолиси учун шифокорлар гуруҳи тузилганлигини айтиб ўтди. Масъулларнинг айтишича, шунингдек Кўл ҚВП шароитини яхшилаш тўғрисида таклифлар ўртага ташланган.
«Энг қувонарлиси, ушбу қишлоқ аёлларида оилавий муносабатларни қадрлаш ҳисси юқори даражада бўлганлиги боис ҳам қишлоқ тарихида сўнгги 2–3 йил давомида бирор марта ҳам ажралишлар қайд этилмаган», — дейди туман хотин-қизлар қўмитаси раиси Муҳайё Алмирзаева.
Брифингда шунингдек, Қашқадарё вилояти оилаларни яраштириш бўйича республикада энг яхши кўрсаткичда эканлиги таъкидлаб ўтилди. Маълум бўлишича, вилоятда ўтган йили яраштирувлар сони 424 тага кўпайган.
Туман хотин-қизлар қўмитаси раислари, вилоят ИИБ, прокуратура, суд, «Оила» илмий-амалий маркази ходимлари ҳамда ОАВ вакиллари иштирок этган матбуот брифингида Марказий банкнинг Қашқадарё вилоят бош бошқармаси мутахассиси Дилфуза Аминованинг маълум қилишича, вилоятдаги аёлларни қўллаб-қувватлаш учун Хотин-қизларни ва оилаларни қўллаб-қувватлаш Жамоат Фонди маблағлари ҳисобидан вилоятга 3 миллиард 626 миллион маблағ ажратилган.
«Ушбу маблағлар ҳисобидан вилоятдаги аёлларни қўллаб-қувватлаб, уларнинг тадбиркорлик фаолиятини йўлга қўйиш учун йиллик 7 фоизли кредитлар берилиши кўзда тутилган, — дейди Дилфуза Аминова. – Айни кунга қадар 300 миллиондан ортиқ маблағлар ўз бизнесини бошлаш ниятида бўлган аёлларга кредит сифатида тақдим этилди».
Эслатиб ўтамиз, бундан аввалроқ «Дарё»да 2 метр ёққан қор сабаб Кўл қишлоғи 10 кунга ташқи дунёдан узилиб қолгани, бу кунларда аҳоли қандай ҳаёт кечиргани ва қишлоқдаги бошқа муаммолар ҳақида мақола эълон қилинганди. Ўша мақолада туғуруқ пайти яқинлашган ҳомиладор аёллар туман марказидаги шифохонага бориш учун 250 минг сўмга машина «буюртма қилишга мажбур бўлаётгани ҳам ёзилганди.
Изоҳ (0)