Ўзбекистон Республикаси Ички ишлар вазири ва Адлия вазирининг 2019 йил 13 февралда имзолаган «Давлат хизматлари марказлари орқали тажриба тариқасида кўрсатилаётган йўл ҳаракати хавфсизлиги соҳасидаги айрим хизматларни такомиллаштириш тўғрисида»ги қарорига асосан, эндиликда фуқаролар жорий йилнинг 1 апрелидан бошлаб Ягона интерактив давлат хизматлари портали орқали онлайн тартибда ҳайдовчилик гувоҳномаларини алмаштириш учун мурожаат этишлари мумкин, бунда уларнинг фотосуратлари Ички ишлар вазирлигининг маълумотлар базасидан автоматлаштирилган тизим орқали олиниши (мазкур фотосурат мурожаатчини қониқтирмаган тақдирда, ўзи келган ҳолда фотосуратга тушиши мумкин) кўрсатилган.
Шунингдек, Давлат хизматлари агентлиги ва Ички ишлар вазирлиги Йўл ҳаракати хавфсизлиги бош бошқармасига хорижий тажрибани чуқур ўрганган ҳолда автомототранспорт воситаларини давлат рўйхатидан ўтказиш давлат хизматини кўрсатишнинг соддалаштирилган ҳамда автоматлаштирилган тизимини ишлаб чиқиш ва амалиётга тадбиқ этиш вазифаси юклатилган.
Эслатиб ўтамиз, Ўзбекистон Республикаси Вазрилар Маҳкамасининг 2017 йил 2 мартдаги 116-сон қарорига мувофиқ амалдаги миллий ҳайдовчилик гувоҳномаларини янги намунадаги миллий ҳайдовчилик гувоҳномаларига алмаштириш 2019 йил 1 январь — 2020 йил 31 декабрь даврида — эски намунадаги барча миллий ҳайдовчилик гувоҳномалари учун, уларнинг берилган санасидан қатъи назар — мажбурий тартибда амалга оширилиши ҳамда 2021 йил 1 январдан эски намунадаги миллий ҳайдовчилик гувоҳномалари ҳақиқий эмаслиги белгиланган. Мазкур давлат хизматидан фойдаланиш учун фуқаролар паспорт ва эски намунадаги ҳайдовчилик гувоҳномаси ҳамда унинг талони, шунингдек ЭКОИҲнинг 70%и миқдорида тўлов амалга оширилганлигини тасдиқловчи ҳужжатларни тақдим этишлари талаб этилади.
Изоҳ (0)