Ўзбекистонда «Меҳрибонлик» уйлари босқичма-босқич кам комплектли болалар шаҳарчалари ва ижтимоий муассасаларнинг бошқа муқобил шаклларига ўтказилади. Бу Президентнинг «Етим болалар ва ота-онасининг қарамоғидан маҳрум бўлган болаларни ижтимоий ҳимоя қилишни кучайтиришга оид қўшимча чора-тадбирлар тўғрисида» қарорида кўзда тутилган.
Ҳужжат билан Халқ таълими вазирлигига 2019 йил 1 июнга қадар муддатда 2019—2023 йилларда«Меҳрибонлик» уйларини ноинституционаллаштириш дастурини ишлаб чиқиш ва Вазирлар Маҳкамасига киритиш;
«Оила» илмий-амалий тадқиқот маркази, Хотин-қизлар қўмитаси, Фуқароларнинг ўзини ўзи бошқариш органлари фаолиятини мувофиқлаштириш бўйича республика кенгаши, Республика болалар ижтимоий мослашуви маркази билан биргаликда 2019 йил 1 июнга қадар муддатда ҳукуматга болаларни тарбиялаш учун оилага қабул қилаётган (патронат) васий ва ҳомийликка номзодларни, фарзандликка олаётганлар ва оилавий болалар уйларининг тарбияловчи ота-оналарини танлаш ва кузатиб бориш тизимини такомиллаштириш бўйича таклифлар киритиш;
Ахборот технологиялари ва коммуникацияларини ривожлантириш вазирлиги билан биргаликда бир ой муддатда Халқ таълими вазирлиги ва бошқа давлат органларининг «Ишонч телефонлари» орқали етим болалар ва ота-онасининг қарамоғидан маҳрум бўлган болаларга ёрдам кўрсатиш тизимини ташкил қилиш, шунингдек, «Меҳрибонлик» уйлари ва болалар шаҳарчаларида зарур алоқа воситалари билан жиҳозланган алоҳида хоналар ажратилиши, «Ишонч телефонлари» узлуксиз ишлаши ҳамда улардан тарбияланувчиларнинг эркин фойдаланишини таъминлаш;
Бандлик ва меҳнат муносабатлари, Соғлиқни сақлаш ва Молия вазирлиги билан биргаликда бир ой муддатда «Меҳрибонлик» уйлари, болалар шаҳарчалари ва болалар уйларига 1 та психолог штат бирлиги, тарбияланувчилари сони 200 нафардан ортиқ бўлган «Меҳрибонлик» уйлари, болалар шаҳарчалари ва болалар уйларига 2 та психолог штат бирликларини киритиш;
Ахборот технологиялари ва коммуникацияларини ривожлантириш ҳамда ва Молия вазирликлари билан биргаликда 2019 йил давомида «Меҳрибонлик» уйлари ва болалар шаҳарчаларида Халқ таълимини ривожлантириш жамғармаси маблағлари ҳисобидан замонавий компьютер синфларини очиш, тарбияланувчиларни замонавий компьютер дастурлаш кўникмаларига ўқитишни ташкил қилиш ва ахборот технологиялари соҳасида ёш мутахассислар тайёрланишини таъминлаш топширилди.
Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари:
оилавий васийлик ва ҳомийликнинг турли шаклларини яратишга кўмаклашади;
2019 йил 1 июнга қадар «Меҳрибонлик» уйлари, болалар шаҳарчалари ва болалар уйларининг ҳудудлари ва хоналари видеокузатув камералари билан жиҳозланишини таъминлайди, видеоёзувлар махсус архивда камида бир ой давомида сақланади.
Халқ таълими вазирлиги ва Соғлиқни сақлаш вазирлиги «Меҳрибонлик» уйлари, болалар шаҳарчалари ва болалар уйларидаги видеокузатув камераларининг техник созлиги ва узлуксиз ишлаши, кейинчалик уларни вазирликлар тизимида архивлаштиришни таъминлайди.
Изоҳ (0)