ДХХга тайинланган янги раҳбар, ўлдига чиқарилган Озода Нурсаидова, очилиши кечиктирилган Humo Arena ва куннинг бошқа муҳим хабарлари

11 февралнинг эътиборга молик янгиликлари — «Дарё» дайжестида.

Давлат хавфсизлик хизмати раиси Ихтиёр Абдуллаев саломатлиги туфайли ўз лавозимини тарк этди.

Унинг ўрнини Мудофаа вазири генерал-лейтенант Абдусалом Азизов эгаллади.

Тошкент ҳарбий округи қўмондони Баҳодир Қурбонов мудофаа вазири этиб тайинланди.

Президент матбуот хизматининг ёзишича, Ихтиёр Абдуллаев кейинги бир йилда бўйин ва бел умуртқа поғонасида икки марта оғир жарроҳлик амалиётини ўтказган.

***

Озода Нурсаидованинг вафот этгани ҳақида ёлғон маълумот тарқалди. Унинг аҳволи анча яхши.

«Айни вақтда опам шифохонада даволанмоқдалар. Аҳволлари анча яхши. Шифохонадан чиққанларидан сўнг батафсил интервью бериб, барчасига ойдинлик киритадилар», — дейди хонанданинг синглиси Нилуфар Нурсаидова.

***

Humo Arena очилиши баҳорга кўчирилди.

Арена қурилиши 2017 йилнинг бошида бошланган.

Дастлаб кўп функционал музлик мажмуаси 2018 йилнинг учинчи чорагида, кейин 2018 йилнинг охирига қадар ишга туширилиши режалаштирилган.

***

Бу ҳафтада Ўзбекистонга Волгабўйидан салқин ҳаво массалари кириб келади.

13—14 февралда мамлакат илиқ ҳаво массалари таъсири остида бўлади. Сўнг Волгабўйи ҳудудларидан нисбатан салқин ҳаво массалари кириб келади. Шунда мамлакатнинг баъзи жойларида ёмғир ёғади, шимолда ёғингарчилик (ёмғир, қор) бўлади. 14 февралда кундуз куни ҳаво ҳарорати 5-10 даража илиққача пасаяди.

***

Россиядаги ЙТҲда икки ўзбекистонлик ҳалок бўлди.

20 нафар йўловчини (уларнинг барчаси — Ўзбекистон фуқаролари) олиб кетаётган Mercedes микроавтобуси меҳнат фаолияти учун рухсатномаларни расмийлаштириш учун Тобольскдан Тюменга кетаётиб, юк автомобили билан тўқнашиб кетган. Икки киши вафот этган, бир киши жабрланган. Қолган 17 фуқаро жабрланмаган.