Жиззахда пиёдани уриб юбориб, унинг ўлимига сабабчи бўлган ҳайдовчи 5 йилга қамалди

Жиноят ишлари бўйича Мирзачўл туман суди 25 январь куни фуқаро Саврон Суюнов (исм-фамилияси ўзгартирилган)га нисбатан юритилган жиноят ишини кўриб якунлади. Бу ҳақда суд раиси Мақсуд Райимов «Дарё» га хабар берди.

Судланувчи Саврон Суюнов 2018 йилнинг сентябрь ойида ўзининг бошқарувидаги Cobalt русумли автомашинани маст ҳолатда Бахмал йўналишида бошқариб кетаётган вақтида, ўзига қарама-қарши келаётган Хўжамқул Ғоиповнинг бошқарувида бўлган Nexia русумли автомашинани йўналишига чиқиб кетиб, ушбу транспорт воситаларини тўқнашиб кетиши натижасида йўл-транспорт ҳодисасини содир этган.

Натижада Nexia русумли автомашина ҳайдовчиси Хўжамқул Ғоипов тан жароҳати олиб воқеа жойида вафот этган.

Шунингдек, ЙТҲ натижасида Nexia русумли автомашина салонида бўлган О.Йўлдошева, унинг ўғли вояга етмаган 2014 йилда туғилган М.Муслимов, бундан ташқари Cobalt русумли автомашина салонида бўлган Э.Ўришев, Н.Пўлатовлар «ҳаёт учун хавфли бўлган оғир тан жароҳати» олиб, Бахмал туман ТМКнинг шошилинч бўлимига ётқизилган.

Суд Саврон Суюновни Ўзбекистон Республикаси Жиноят кодексининг 266-моддасининг (Транспорт воситалари ҳаракати ёки улардан фойдаланиш хавфсизлиги қоидаларини бузиш) 2-қисмида назарда тутилган жиноятни содир этганликда айбдор деб топиб, уч йилга транспорт воситаларини бошқариш ҳуқуқидан маҳрум қилиниб, беш йил озодликдан маҳрум этиш жазоси тайинлади.