4 февраль куни Австралиянинг шимоли-шарқий соҳилида Таунсвилл шаҳрининг сув остида қолган ҳудудларидан мингдан ортиқ одамлар эвакуация қилинди. Бу ҳақда «Вести.ru» хабар берди.
Сув остида қолган ҳудудлардан аҳолини қутқариш учун Ҳарбий ҳаво кучлари ва армия сафарбар этилган.
Қайд этилишича, Таунсвилл ва шаҳар атрофидаги ҳудудлардаги 20 мингдан ортиқ уйлар сув остида қолган. Яқин вақтларда эвакуация қилинганлар сони ортиши кутилмоқда.
Сув тошқиндан зарар кўрган ҳудудларга зарур маҳсулотлар ва озиқ-овқатлар етказиб берилмоқда. Қутқарув хизмати ва полиция сув остида қолган ҳудудларни қўриқлаб, аҳолига ҳарбий кучлар келгунча уйларини тарк этмасликка чақирмоқда. Сабаби сув тошқини бўлган кўчаларда тимсоҳлар пайдо бўлиб, одамларга ҳужум қилмоқда.
Синоптикларнинг прогнозига кўра, шиддатли ёмғир Квисленд ҳудудида камида ҳафтанинг ўрталаригача сақланиб қолади.
Изоҳ (0)