Huawei компанияси Balong 5000 номи остида кўп тартибли 5G чипсети ва унинг асосида яратилган жаҳондаги биринчи тижорий 5G модем - Huawei 5G CPE Pro’ни расман намойиш қилди. Ушбу икки янги маҳсулот биргаликда мобил қурилмалар, уйлар, автомобиль ва офисларни энг тезкор симсиз алоқа билан таъминлайди.
Balong 5000 чипсети 5G-алоқа даврини расман бошлаб бермоқда. Смартфонлардан ташқари у кенг миқёсдаги 5G-маҳсулотларни, жумладан, кенг полосали уй қурилмалари, автомобиль тизимлари ва 5G-модулларни қўллаб-қувватлайди ҳамда компания мижозларига энг турфа фойдаланиш сценарийларига мўлжалланган янги даражадаги симсиз алоқани тақдим қилади.
«Balong 5000 истеъмолчилар учун бутунлай янги дунёни очади, — дейди Huawei Consumer Business Group ижрочи директори Ричард Ю. — Ушбу қурилма ялпи сунъий интеллектни яратиш учун зарур бўлган тезкор алоқани кафолатлайди. Янги Huawei 5G CPE Pro модеми Balong 5000 асосида яратилган бўлиб, унинг ёрдамида жуда катта тезликда ишлайдиган тармоқлардан эркин фойдаланиш мумкин. Huawei 5G-тармоқлар учун тўлиқ кўламдаги ускуна ва ечимларни, жумладан, чиплар, модемлар, булут-сервислар ҳамда чипларни таклиф қилиши боис, мазкур сегментда ҳақли равишда етакчи ўринни эгаллаб келмоқда. Биз келгусида ҳам 5G-тармоқларнинг янги имкониятлари ва устунликларини жаҳондаги барча фойдаланувчиларга очишга ҳаракат қиламиз, бу орқали уларнинг кундалик турмушидаги барча жабҳаларни ўзгартирамиз».
Balong 5000: 5G-даври остонасида
Huawei ягона чипдаги кўп тартибда ишлайдиган жаҳондаги илк 5G-модемни тақдим қилмоқда
Юқори даражадаги интеграция ва кичик ўлчамлар туфайли Balong 5000 бир вақтнинг ўзида 2G, 3G, 4G ва 5G тармоқларини қўллаб-қувватлайди. Бу сигнал кечикишини ва бир вақтда турли режимларда маълумотларни узатиш жараёнида энергия сарфини самарали тарзда қисқартиришга имконият бериб, биринчи тижорий 5G-тармоқларда мобил қурилмалардан фойдаланиш қулайлигини оширади. Balong 5000 бундай сериядаги симсиз чипсетларни ривожлантириш йўналишида олға қадам бўлди, десак янглишмаймиз.
Бундан ташқари, Balong 5000 5G-тармоққа мўлжалланган энг юқори тезликда юклашга доир саноат стандартларига жавоб берадиган жаҳондаги илк чипга айланди. Sub-6 ГГц қуйи диапазонида (асосан 5G учун ишлатиладиган паст частотали диапазон) Balong 5000 сониясига 4,6 Гбитгача бўлган юклаш тезлигини таъминлай олади. Миллиметрли тўлқинлар кўламида (5G учун қўшимча тарзда ишлатиладиган юқори частотали диапазон) Balong 5000 сониясига 6,5 Гбитгача бўлган юклаб олиш тезлигини тақдим қилади, бу эса айни пайтда кенг тарқалган 4G LTE технологиясидан 10 маротаба тезроқ демакдир.
Balong 5000 автоном (SA) ва автоном бўлмаган (NSA) ҳар иккала 5G архитектурасини қўллаб-қувватлайдиган жаҳондаги биринчи чип ҳисобланади. Автоном бўлмаган 5G архитектураси ҳозирда мавжуд бўлган 4G LTE тармоқлар асосида, автоном архитектура эса ўзининг мустақил инфратузилмасида барпо этилади. Balong 5000 5G тараққиётининг турли хил босқичларида ҳам исталган фойдаланувчилар ва операторларнинг талабларига мослаша олади.
Шунингдек, Balong 5000 Vehicle to Everything (V2X) технологияси бўйича автотранспортга уланиш функциясини қўллаб-қувватлайдиган жаҳондаги илк кўп тартибли чип бўлиб, уланган ва ўзи ҳаракатланадиган автомобиллар учун зарур ҳисобланган ишончли алоқани қисқа кечикишлар билан таъминлай олади. Balong 5000 асосидаги 5G-тармоқда ишлайдиган Huawei смартфонлари Барселонада ўтказиладиган бутунжаҳон мобил технологиялар кўргазмаси - Mobile World Congress доирасида намойиш этилади.
Huawei 5G CPE Pro: уй тармоқлари тараққиётида янги поғона
Huawei 5G CPE Pro реал вақтдаги тармоқ синовида сониясига 3,2 Гбит юклаш тезлигини қайд қилди
Balong 5000 базасида яратилган Huawei 5G CPE Pro модеми 4G ва 5G стандартларидаги симсиз алоқани қўллаб-қувватлайди. Бу модем билан 5G тармоқларда HD-аниқликдаги ва 1 ГБ ҳажмдаги видеони юклаш учун 3 сония вақт кетади, 8К-аниқликдаги видеони эса танаффус ва узилишларсиз томоша қилиш мумкин. Шу йўсин уйга мўлжалланган телекоммуникацион ускуналар учун янги стандартлар ўрнатилмоқди. Янги модем, шу билан бирга, кичик ва ўрта бизнесга ўта юқори тезликдаги корпоратив тармоқларни ташкил қилишга имконият яратади.
Huawei 5G CPE Pro сониясига 4,8 Гбитгача бўлган юклаб олиш тезлигини таъминлайдиган Wi-Fi 6 технологиясидан фойдаланади. Бу ақлли уй ускунасига тегишли 5G тармоқларга уланиш учун талаб этиладиган Huawei HiLink потоколларини қўллаб-қувватлайдиган кенг истеъмолга мўлжалланган биринчи 5G модемдир.
5G технологияларининг биринчи кашфиётчиси сифатида Huawei компанияси бу соҳадаги тадқиқот ва ишланмаларни 2009 йил аввалида бошлаган. Ва ҳозирга келиб янги авлоддаги тармоқларни йўлга қўйиш учун комплекс ечимларни таклиф қиладиган ягона ишлаб чиқарувчига айланди. Ушбу йўналишда компаниянинг 5700 нафардан зиёд муҳандислари меҳнат қилади ва уларнинг 500 нафаридан ортиғи 5G соҳасига ихтисослашган кадрлардир. Умумий ҳисобда Huawei жаҳон бўйлаб 5G-ечимларни ривожлантириш билан шуғулланадиган 11 та қўшма тадқиқот марказлари ва ишланмаларни ташкил қилган.
Изоҳ (0)