Ўзбекистонда 2030 йилгача темир йўл соҳасини инновацион ривожланиш истиқболлари муҳокама этилди

Инновацион ривожланиш вазирлиги, «Ўзбекистон темир йўллари» АЖ ҳамда Тошкент темир йўл муҳандислари институти ҳамкорлигида «Темир йўл соҳасини инновацион ривожлантириш истиқболлари» мавзусида форсайт усулида давра суҳбати ташкил этилди. Бу ҳақда «Дарё»га вазирлик матбуот хизмати маълум қилди.

Тадбирда 2030 йилгача Ўзбекистонда темир йўл соҳасини инновацион ривожланиш истиқболлари муҳокама этилди.

Бугунги кунда Тошкент темир йўл муҳандислари институтида 3 та ўқув ва 51 та илмий лаборатория фаолият юритаётгани қайд этилди. Ушбу лабораториялар бор имконияти билан ишлаши учун лаборатория ходимлари хориждаги етакчи илмий-текшириш муассасаларида ёки ишлаб чиқариш корхоналарининг илмий лабораторияларида стажировкадан ўтишлари, лабораториянинг ўзи эса аккредитациядан ўтказилиши лозимлиги айтилди.

Институтнинг 481 нафар талабаси Россиянинг етакчи ОТМларида бакалавр, магистр ва докторлик йўналишлари бўйича таълим олишга жўнатилган бўлиб, улардан 248 нафари ўқишни муваффақиятли битириб қайтган. Жорий йилда эса институтнинг 100 нафар ўқитувчи ва талабалари Германияда малака оширишга жўнатилиши режалаштирилган.

Инновацион ва илмий ишланмаларни молиялаштириш учун махсус жамғарма фаолиятини фаоллаштириш масаласи ҳам ўртага ташланди. Республикадаги йирик ташкилотлар, илмий тадқиқот муассасаларининг лаборатория ходимлари учун ўқув курсларини ташкил этиш, шунингдек, замонавий талабларга жавоб берадиган ишчи-ходимларни (хусусан, энг сўнгги русумлардаги ускуналар ва янгича услубларни қўллай биладиган чилангарларни) тайёрлашга эҳтиёж борлигига урғу берилди.

Темир йўллардаги муаммоларнинг илмий-тадқиқот институтларига тез ва тўлиқ етиб келишини таъминлайдиган тизимни яратиш, бевосита ишлаб чиқаришда фаолият юритаётган ходимларни илмий-текшириш лабораторияларига жалб қилиш соҳанинг янада ривожланишига хизмат қилади. Шунингдек, институт ўқитувчилари ва лаборатория ходимларини ишлаб чиқаришга график асосида бориб, тажриба алмашишлари ижобий натижаларга олиб келади. 2018 йилда Тошкент темир йўл муҳандислари институти томонидан яратилган 18 та илмий ишланма ишлаб чиқаришга жорий этилди, тадқиқотларни янада такомиллаштириш орқали эса бу кўрсаткичларни янада оширишга эришилиши кутилмоқда.

Талабаларнинг инновацион ғояларини қўллаб қувватлаш мақсадида Инновация маркази — акселераторни ташкил этиш таклифи берилди. Инновация маркази халқаро грантлар, «Ўзбекистон темир йўллари» АЖ маблағлари, маҳаллий грантлар ва ишланмаларни тижоратлаштиришдан тушган маблағлар ҳисобидан молиялаштирилиши мумкинлиги билдирилди.