Тошкентнинг Мирзо Улуғбек туманидаги хонадонлардан бирига бостириб кирган босқинчилар қўлга олинди. Бу ҳақда «Ўзбекистон24» телеканалида кўрсатув намойиш этилди, деб хабар берди UZ24.
16 январдан 17 январга ўтар кечаси соат 02:30 да 6 кишидан иборат жиноий гуруҳ юзларига ниқоб, қўлларига қўлқоп ва темир бўлаги ҳамда ёғочдан ясалган таёқ билан қуролланиб, хонадонга бостириб кирган.
Уларнинг бу хатти-ҳаракати хонадонда ўрнатилган кузатув камерасига тушиб қолган. Жиноий гуруҳ аъзоларининг 4 таси девор ошиб хонадонга кириб олиб, ташқарида қолган 2 та шеригига дарвозани очиб берган. Бу пайтда хонадон эгалари уйда бўлишмаган. Уйда бўлган қоровул ва энага босқинчиларни сезишмаган.
Жиноий гуруҳ аъзолари ушбу хонадондан кўп миқдорда пулларни ва бошқа моддий бойликларни олиб кетмоқчи бўлиб турган вақтида уй эгаси келиб қолади. Ташқарига чиққан қоровул босқинчиларни уй эгаси билан бирга келган меҳмон деб ўйлаб саломлашмоқчи бўлганда босқинчилар унга турли тан жароҳатлари етказиб, қочиб кетишган. Хонадон эгаси уларнинг ортидан қувлаб, улардан бирини ушлаб олади ва ички ишлар ходимларига топширади.
Олиб борилган тезкор ҳаракатлар натижасида жиноий гуруҳнинг бошқа аъзолари ҳам ўша куннинг ўзида ушланган.
Мазкур ҳолат бўйича ЖКнинг 164-моддаси 4-қисми (босқинчилик) бўйича жиноий иш қўзғатилиб, тергов ҳаракатлари олиб борилмоқда.
Изоҳ (0)