Бош прокуратура «Ўзметкомбинат»нинг собиқ раҳбариятига қарши тергов олиб бормоқда. Бу ҳақда Бош прокуратура матбуот хизмати раҳбари Сурайё Раҳмоновага асосланиб, «Kun.uz» хабар бермоқда.
«Комбинатнинг собиқ мансабдор шахсларига нисбатан тергов олиб борилмоқда, янгилари бўйича жиноий таъқиб йўқ», — деди Раҳмонова хоним.
Куни кеча комбинатнинг ўзи унинг ходимлари қўлга олингани, шунингдек ўғирлик ва растрата аниқлангани ҳақида бир қатор ОАВда эълон қилинган хабарларни рад этиб чиққан эди.
«Мақолаларда билдирилишича, комбинатнинг харидлар бўйича менежери О.Р. 2019 йилнинг январь ойи бошида катта миқдорда ўғирлик ва растратада айбланиб ишдан бўшатилган. Бу факт ёлғон. Харидлар бўйича бошқарма бошлиғи Отабек Расулов ҳали ҳам аввалги лавозимда ишламоқда. Комбинат ва SFI Management Group ишончли бошқарувига О.Расулов томонидан ҳуқуқбузарликлар содир этилгани тўғрисида, жумладан, ҳуқуқни муҳофаза қилиш органлари томонидан бирор-бир факт, мурожаат ёки маълумот келиб тушмаган», — дейилади комбинат баёнотида.
Маълумот учун, «Ўзметкомбинат» Ўзбекистонда қора металлургия соҳасида етакчи корхона ҳисобланади. 2019 йилда унинг ташкил этилганига 75 йил тўлади. 2017 йил июлида комбинатнинг устав капиталидаги давлат улуши ишончли бошқарувчиси сифатида SFI Management Group хорижий компанияси жалб этилди.
Изоҳ (0)