9 январь, чоршанба куни футбол бўйича Осиё Кубоги 1-турининг «F» гуруҳидаги илк учрашувда Япония терма жамоаси Туркманистон термаси билан жанг қилди.
1-бўлимнинг 26-дақиқасида Туркманистон ярим ҳимоячиси Арслонмурод Омонов(Ўзбекистон Суперлигасида «Бухоро» таркибида фаолият олиб боради) Япония термаси дарвозасига узоқ масофадан гол урди (1:0). Жамоалар 0:1 ҳисобида қисқа танаффусга йўл олди.
2-бўлимнинг 56-дақиқасида Генки Харагучи узатмасини Юя Осако туркманлар дарвозасига жойлаб қўйди ва ҳисобни тенглаштирди (1:1). Орадан 4 дақиқа ўтиб, Юя Осако дублга эришди (2:1). 71-дақиқага келиб, Рицу Доан Маммет Ўрозмуҳаммедов қўриқлаётган дарвозани ишғол қилди (3:1). Учрашувнинг 79-дақиқасида Япония термаси дарвозабони рақиб ўйинчисига қарши қўпол ҳаракати учун ҳакам томонидан японлар дарвозаси томон ўн бир метрлик жарима зарбаси белгиланди ва Аҳмад Отаев ушбу имкониятдан унумли фойдаланди (3:2).
Япония мусобақанинг дастлабки беллашувида қийин ва иродали ғалабани қўлга киритди.
Эслатиб ўтамиз, мусобақа 1-турининг «F» гуруҳидаги иккинчи ўйинида Ўзбекистон терма жамоаси Уммон термасига қарши майдонга тушади. Мазкур ўйин «Дарё»нинг Telegram’даги расмий спорт каналида матнли-онлайн трансляция қилинади. Ўтиш учун ҲАВОLAни босинг.
Осиё Кубоги—2019
9 январь, чоршанба
«F» гуруҳи, 1-тур
Япония — Туркманистон 3:2
Голлар: 0:1 — 26 Арслонмурод Омонов, 1:1 — 56 Юя Осако, 2:1 — 60 Юя Осако, 3:1 — 71 Рицу Доан, 3:2 — 79 Аҳмад Отаев.Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)