Андижон ҳокими ўринбосарининг вафоти, «Запорожец»дан антиқа машина ясаган қорақалпоғистонлик, поезд остида қолган нукуслик ўсмир ва куннинг бошқа муҳим хабарлари

7 январнинг асосий янгиликлари — «Дарё» дайжестида.

Андижон вилояти ҳокимининг инвестициялар, инновациялар, хусусийлаштирилган корхоналарга кўмаклашиш, эркин иқтисодий ва кичик саноат зоналари ҳамда туризмни ривожлантириш масалалари бўйича ўринбосари Саломбек Ҳабибуллаев 6 январь куни оламдан ўтди.

Соғлиқни сақлаш вазирлиги ўлим ҳолати миокард инфаркти натижасида юз берганини маълум қилган.

Маълумот учун, Саломбек Ҳабибуллаев 2018 йилнинг 26 январидан ушбу лавозимда фаолият юритиб келаётганди.

***

Қорақалпоғистоннинг Амударё тумани Манғит шаҳрида истиқомат қилувчи Алишер Йўлдошев эски «Запорожец» автомобилининг корпуси асосида янги автомобиль йиғди.

Антиқа автомобилни яратишда Тикўнинг мотори, Mazda’нинг ўриндиғи, Malibu’нинг рули ва орқа фаралари, Captiva’нинг олд қопламасидан фойдаланилган. Ихтирочи автомобилга «Ягона» деб ном берган.

***

Нукусда йўловчи поезди қулоғида наушник бўлган 2002 йилда туғилган ўсмирни босиб кетди.

2019 йил 5 январь куни соат 13:45 да  Нукус шаҳри ҳудудидан ўтувчи «Хўжайли-Нукус» темир йўли перегонининг 2-пикети 699-километрида 334-сонли «Саратов-Ургенч-Тошкент» йўловчи ташувчи поездини тортиб келаётган UZTE16М2-033-сон тепловози темир йўл рельсининг ўртасида қулоғига наушник таққан, Нукус шаҳрида яшовчи 2002 йилда туғилган Р.Д.ни босиб олган.

Натижада, Р.Д. воқеа жойида вафот этган.

***

Наманганликлар жорий йил 6 январь куни яна гумбурлаган овоз эшитган.

Бир неча марта такрорлаган бу овоз қаердан ва нима сабабдан келаётганлиги ҳозиргача номаълум бўлиб қолмоқда.

***Дональд Трамп ва Роберт Де Нирони мафтун қилган, бетакрор ижроси ва гўзаллиги билан дунёда минглаб мухлислар эътиборини қозонган ўзбек пианиночиси — Лола Астанова Ўзбекистон халқаро форумлар саройида ўз чиқиши билан жаҳон классик мусиқаси шинавандаларини шод этди.

Лола Астанованинг Тошкентдаги чиқиши дирижер Владимир Федосеев бошчилигидаги П.И.Чайковский номидаги катта симфоник оркестри концерти доирасида бўлиб ўтди. Мазкур концерт санъатга ҳомийлик қилиб келувчи бизнесмен Алишер Усмоновнинг Тошкент аҳлига янги йил совғаси бўлди.