Туркия Ўзбекистонда металл фойдали қазилмалар конини қидириш бўйича якуний келишув имзолашни мўлжалламоқда. Бу ҳақда мамлакат энергетика ва табиий ресурслар вазири ўринбосари Митхат Канзизга асосланиб Spot хабар берди.
Ўзбекистон Судандан кейин Туркия фойдали қазилмаларни қидириш билан шуғулланувчи иккинчи давлатга айланади, дея таъкидлаб ўтган Канзиз. Буни Минерал тадқиқотлар ва қидириш бош бошқармасининг шўъба корхонаси амалга оширади.
«Биз Ўзбекистон билан якуний келишувни имзолаш ниятидамиз. У 700 квадрат километрлик майдонга эга ҳудуд ва иккита лицензияни ўз ичига олади», — дейди Канзиз.
Туркия Суданда иккита олтин конини қидириш учун филиал ташкил этди. Компания уч йиллик тадқиқот ўтказади, сўнг майдони 325 квадрат километр бўлган икки лицензион ҳудудда тижорат фаолиятини бошлайди.
«Биз Африка ва Ўрта Осиёдан бошлаяпмиз, аммо Венесуэла сингари мамлакатлар билан давом эттирмоқчимиз», —деди Канзиз.
Унинг билдиришича, ушбу мамлакатлардаги фаолият давлат-хусусий шериклик ёки ҳукумат тадбирлари доирасида амалга оширилиши мумкин.
Изоҳ (0)